ശബരിമല തീര്‍ത്ഥാടനം സര്‍ക്കാര്‍ അട്ടിമറിക്കുന്നെന്ന് ചെന്നിത്തല

തിരുവനന്തപുരം: ശബരിമല തീര്‍ത്ഥാടനം സംസ്ഥാന സര്‍ക്കാര്‍ അട്ടിമറിക്കുകയാന്നെന്ന് ആരോപിച്ച് പ്രതിപക്ഷ നേതാവ് രമേശ് ചെന്നിത്തല. നിയമസഭായോഗത്തിന് പിന്നാലെ നടത്തിയ വാര്‍ത്താ സമ്മേളനത്തിലാണ് ശബരിമല വിഷയത്തില്‍ രമേശ് ചെന്നിത്തല സര്‍ക്കാരിനെ രൂക്ഷമായ ഭാഷയില്‍ വിമര്‍ശിച്ചത്. ഇതേ വിഷയം ഉന്നയിച്ച് നിയമസഭാ നടപടികള്‍ പ്രതിപക്ഷം തടസ്സപ്പെടുത്തിയിരുന്നു.

ശബരിമലയെ തകര്‍ക്കാനുള്ള നടപടികളാണ് സംസ്ഥാന സര്‍ക്കാര്‍ സ്വീകരിക്കുന്നതെന്ന് ചെന്നിത്ത കുറ്റപ്പെടുത്തി. ഇതിന് കുടപിടിക്കുകയാണ് സംഘപരിവാര്‍ സംഘടനകള്‍. ശബരിമലയില്‍ വിശ്വാസികളെ ബുദ്ധിമുട്ടിക്കുന്ന എല്ലാ നിയന്ത്രണങ്ങളും നീക്കണം. ഇന്നുതന്നെ ശബരിമലയിലും പ്രദേശങ്ങളിലും ഏര്‍പ്പെടുത്തിയിരിക്കുന്ന നിരോധനാജ്ഞ പിന്‍വലിക്കണം. ഇതിന് സര്‍ക്കാര്‍ തയ്യാറാകുന്നത് വരെ സഭയ്ക്കകത്തും പുറത്തും പ്രതിഷേധം തുടരുമെന്നും ചെന്നിത്തല കൂട്ടിച്ചേര്‍ത്തു.