ശബരിമല പ്രശ്നം സാമ്പത്തിക സ്ഥിതിയെ ബാധിക്കുമെന്ന് ധനമന്ത്രി

കോഴിക്കോട്: ശബരിമലയിലെ പ്രശ്നങ്ങള്‍ സംസ്ഥാനത്തിന്‍റെ സാമ്പത്തിക സ്ഥിതിയെ ദോഷകരമായി ബാധിക്കുമെന്ന് ധനമന്ത്രി തോമസ് ഐസക്. ശബരിമല പ്രശ്നം സാമൂഹികാന്തരീക്ഷത്തെ മാത്രമല്ല ബാധിക്കുന്നതെന്നും മന്ത്രി വ്യക്തമാക്കി. സമരം ചെയ്യുന്നവര്‍ ഇക്കാര്യം മനസിലാക്കണമെന്നും അദ്ദേഹം ഓര്‍മ്മിപ്പിച്ചു. കോഴിക്കോട് മാധ്യമപ്രവര്‍ത്തകരോട് സംസാരിക്കുകയായിരുന്നു മന്ത്രി.

ശബരിമലയിലെ സമരങ്ങളുടെയും സംഘര്‍ഷങ്ങളുടെയും ഫലമായി സന്ദര്‍ശകരുടെ കുറവ് ഉണ്ടായാല്‍ ഇത് ക്ഷേത്രത്തിന്‍റെ വരുമാനത്തില്‍ കുറയാന്‍ കാരണമാകും. 50 കോടിയോളം രൂപ നിലവില്‍ സംസ്ഥാന സര്‍ക്കാര്‍ ക്ഷേത്രങ്ങളുടെ പ്രവര്‍ത്തനങ്ങള്‍ക്കായി ചെലവഴിക്കുന്നുണ്ട്. ക്ഷേത്രവരുമാനം കുറഞ്ഞാല്‍ സര്‍ക്കാരിന് അധിക ബാധ്യതയുണ്ടാകുമെന്നും മന്ത്രി പറഞ്ഞു. സന്ദര്‍ശകരുടെ എണ്ണത്തില്‍ ഇടിവുണ്ടായാല്‍ വ്യാപാര മേഖലയും ദുരിതത്തിലാകുമെന്നും തോമസ് ഐസക് ചൂണ്ടിക്കാട്ടി.