ശബരിമല: രഹന ഫാത്തിമയെയും കുടുംബത്തെയും സമുദായം പുറത്താക്കി

ആലപ്പുഴ: ശബരിമല കയറാൻ ശ്രമിച്ച രഹന ഫാത്തിമയെ സമുദായത്തിൽ നിന്ന് പുറത്താക്കി. ഹൈന്ദവ വിശ്വാസങ്ങൾക്കും ആചാരാനുഷ്ഠാനങ്ങൾക്കും അനുസൃതമായി ശബരിമലയിൽ എത്തി ദർശനം നടത്താൻ ശ്രമിച്ച മുസ്ലിം നാമധാരിയായ രഹനയെ പുറത്താക്കിയെന്ന് ജമാ അത്ത് കൗൺസിലാണ് അറിയിച്ചത്.

കൊച്ചി സ്വദേശിയായ രഹനയുടെ കുടുംബത്തെ മഹല്ല് അംഗത്വത്തിൽ നിന്ന് മുടക്കണമെന്ന് കൊച്ചി സെൻട്രൽ മുസ്ലിം ജമാ അത്തിനോട് ആവശ്യപ്പെട്ടതായി ജമാ അത്ത് സംസ്ഥാന കൗൺസിൽ സംസ്ഥാന പ്രസിഡന്റ് അഡ്വ.എ.പൂക്കുഞ്ഞ് അറിയിച്ചു. രഹന മതവികാരത്തെ വൃണപ്പെടുത്തിയതിനാൽ 153 A വകുപ്പ് പ്രകാരം സർക്കാർ ക്രിമിനൽ കേസെടുക്കണമെന്നും കൗൺസിൽ പ്രസിഡന്റ് അറിയിച്ചു. രഹന ചുംബന സമരത്തിൽ പങ്കെടുക്കുകയും നഗ്നയായി സിനിമയിൽ അഭിനയിക്കുകയും ചെയ്തിട്ടുണ്ട്.സമുദായത്തിനോ സംഘടനക്കോ രഹനയും കുടുംബവുമായി യാതൊരു ബന്ധവും ഉണ്ടാകില്ലെന്നും ജമാ അത്ത് കൗൺസിൽ അറിയിച്ചു