ചിത്തിര ആട്ടവിശേഷത്തിനായി തുറന്ന ശബരിമല നട അടച്ചു

ശബരിമല: ചിത്തിര ആട്ട വിശേഷത്തിന്‍റെ ഭാഗമായി ഇന്ന് തുറന്ന ശബരിമല നട ഹരിവരാസനം പാടി അടച്ചു. ശബരിമലയില്‍ യുവതീ പ്രവേശനം അനുവദിച്ച സുപ്രീംകോടതി വിധിക്ക് ശേഷം രണ്ടാമതായി നട തുറന്ന ഇന്ന് ശബരിമലയിൽ അനിഷ്ഠസംഭവങ്ങളൊന്നും ഉണ്ടായില്ല. പൊതുവെ സമാധാനപരമായിരുന്നു അന്തരീക്ഷം. വൈകീട്ട് അഞ്ചോടെ തുറന്ന നട 5 മണിക്കൂറോളം നീണ്ട ദര്‍ശനത്തിന് ശേഷമാണ് രാത്രി പത്തോടെ അടച്ചത്. ഏഴായിരത്തോളം പേര്‍ ഇന്ന് ദര്‍ശനം നടത്തിയതായി പോലീസ് പറഞ്ഞു.

സാധാരണയുള്ള ചിത്തിര ആട്ട വിശേഷം ദിനത്തേക്കാള്‍ വന്‍ ആള്‍ത്തിരക്കായിരുന്നു ഇത്തവണ സന്നിധാനത്ത് അനുഭവപ്പെട്ടിരുന്നത്. കഴിഞ്ഞ വര്‍ഷം ചിത്തിര ആട്ട വിശേഷത്തിന് ആയിരത്തോളം പേര്‍ മാത്രമേ ആകെ ദര്‍ശനം നടത്തിയിരുന്നൊള്ളൂവെന്നാണ് കണക്ക്.

ഏറ്റവും ദൈര്‍ഘ്യം കുറഞ്ഞ തീര്‍ത്ഥാടന കാലമാണിത്. ചിത്തിരതിരുനാള്‍ മഹാരാജാവിന്‍റെ ജന്മദിനമാണ് ചിത്തിര ആട്ട തിരുനാളായി ശബരിമലയിൽ ആചരിക്കുന്നത്. ചിത്തിരതിരുനാള്‍ മഹാരാജാവ് കുടുംബസമേതം ശബരിമലയിൽ എത്തിയതിന്‍റെ ഓര്‍മ്മയ്ക്കായാണ് നവംബർ 5 ആട്ടവിശേഷമായി ആചരിക്കുന്നത്. ഇന്നുരാത്രി 10ന് ഹരിവരാസനം ചൊല്ലി നടയടക്കും. നാളെ രാവിലെ 5ന് വീണ്ടും നടതുറക്കും.