തുലാമാസപൂജയ്ക്ക് ശബരിമല നട തുറന്നു

ശബരിമല: തുലാമാസപൂജകള്‍ക്കായി ശബരിമല നട തുറന്നു. ബുധനാഴ്ച വൈകിട്ട് 4.54നാണ് നട തുറന്നത്. എല്ലാ പ്രായത്തിലുമുള്ള സ്ത്രീകള്‍ക്ക് ശബരിമലയിൽ പ്രവേശിക്കാമെന്ന സുപ്രീം കോടതി വിധി വന്ന ശേഷം ഇതാദ്യമാണ് ശബരിമല നട തുറന്നത്. എന്നാൽ മുൻപ് നിയന്ത്രണമുണ്ടായിരുന്ന 10നും 50നും ഇടയിൽ പ്രായമുള്ള ഒരു സ്ത്രീയ്ക്കും ഇന്ന് സന്നിധാനത്ത് എത്താനായില്ല.

ബുധനാഴ്ച രാവിലെ ആന്ധ്രാ പ്രദേശ് കാക്കിനാഡ സ്വദേശിയായ മാധവി എന്ന 45കാരി പ്രതിഷേധക്കാരെ ഭേദിച്ച് പരമ്പരാഗതപാത വഴി സന്നിധാനത്തേയ്ക്ക് നടന്നു തുടങ്ങിയെങ്കിലും പോലീസ് വേണ്ടത്ര സുരക്ഷ ഒരുക്കാതിരുന്നതിനെത്തുടര്‍ന്ന് മടങ്ങേണ്ടി വന്നു. ഇന്ന് ദര്‍ശനം നടത്തുമെന്ന് പ്രഖ്യാപിച്ചിരുന്ന ചേര്‍ത്തല സ്വദേശി ലിബിയ്ക്കും സംഘര്‍ഷത്തെത്തുടര്‍ന്ന് മടങ്ങേണ്ടി വന്നിരുന്നു.

ഇന്ന് രാത്രി പത്ത് മണിയ്ക്ക് ഹരിവരാസനം ചൊല്ലിയാണ് നടയടയ്ക്കുന്നത്. നാളെ രാവിലെ അഞ്ച് മണിയ്ക്ക് നട തുറന്ന് രാവിലെ ഉഷപൂജയ്ക്ക് ശേഷം ശബരിമല മേൽശാന്തി തെരഞ്ഞെടുപ്പ് നടക്കും.