യതീഷ് ചന്ദ്രക്കെതിരെ ഭീഷണി പ്രസംഗം: ശോഭ സുരേന്ദ്രനെതിരെ കേസ്

കണ്ണൂർ: ശബരിമല വിഷയവുമായി ബന്ധപ്പെട്ട് എസ്.പി യതീഷ് ചന്ദ്രയെ ഭീഷണിപ്പെടുത്തിയെന്ന പരാതിയിൽ ബിജെപി സംസ്ഥാന ജനറൽ സെക്രട്ടറി ശോഭ സുരേന്ദ്രനെതിരെ പോലീസ് കേസെടുത്തു. കണ്ണൂർ എസ്.പി ഓഫീസിലേക്ക് നടത്തിയ മാർച്ചിനിടെയാണ് ശോഭ സുരേന്ദ്രൻെറ പ്രകോപന പ്രസംഗം. കണ്ണൂർ ടൌൺ പോലീസാണ് കേസെടുത്തത്.

ബൂട്ടിട്ട് ചവിട്ടുന്നത് പോലെയല്ല, 'നിയുദ്ധ' പഠിച്ചവരുടെ മുറയെന്നായിരുന്നു ശോഭ സുരേന്ദ്രൻെറ ഭീഷണി. ലാത്തിയേക്കാൾ വലിയ ശക്തി തങ്ങൾക്കുണ്ട്. ബൂട്ടിട്ട യതീഷിൻെറ കാൽ ഇനി എത്ര വരെ പൊന്തുമെന്ന് അറിയണം. തങ്ങൾ മുറപ്രയോഗം നടത്തിയാൽ യതീഷിന് കാല് പൊക്കാനാവില്ലെന്ന് യതീഷ് ഓർക്കണമെന്നും ശോഭ സുരേന്ദ്രൻ പ്രസംഗിച്ചിരുന്നു.

ബിജെപി സംസ്ഥാന ജനറൽ സെക്രട്ടറി കെ.സുരേന്ദ്രനെ അറസ്റ്റ് ചെയ്തതിൽ പ്രതിഷേധിച്ചായിരുന്നു ബിജെപിയുടെ മാർച്ച്.