സുരക്ഷാ വലയത്തില്‍ ശബരിമല; സന്നിധാനത്ത് വനിതാ പൊലീസും

പത്തനംതിട്ട: ചിത്തിര ആട്ടവിശേഷത്തിന് നടതുറക്കാനിരിക്കെ ശബരിമലയില്‍ കനത്ത സുരക്ഷാ ക്രമീകരണങ്ങളൊരുക്കി പൊലീസ്. വിവിധ മേഖലകളിലായി മൂവായിരത്തോളം പൊലീസുകാരെയാണ് ശബരിമലയില്‍ വിന്യസിച്ചിട്ടുള്ളത്. പതിനഞ്ച് വനിതാ പൊലീസുകാരെയും സന്നിധാനത്ത് വിന്യസിച്ചിട്ടുണ്ട്. സ്ത്രീകള്‍ കൂടുതലായി എത്തിയാല്‍ നിയന്ത്രിക്കുന്നതിനായാണ് 50 വയസിന് മുകളില്‍ പ്രായമുള്ള വനിതാ പൊലീസുകാരെയും സന്നിധാനത്ത് നിയോഗിച്ചിട്ടുള്ളത്.

അവശ്യമെങ്കില്‍ 15 വനിതാ പൊലീസുകാരെക്കൂടി എത്തിക്കാനുള്ള ക്രമീകരണങ്ങള്‍ പൊലീസ് നടത്തിയിട്ടുണ്ട്. പമ്പയില്‍ നൂറ് വനിതാ പൊലീസുകാരെയും വിന്യസിച്ചിട്ടുണ്ട്. യുവതികള്‍ ശബരിമലയിലെത്തുന്നതിന് തടസ്സമുണ്ടാക്കാന്‍ ആരെയും അനുവദിക്കില്ലെന്ന ഉറച്ച നിലപാടില്‍ തന്നെയാണ് പൊലീസ്. നേരത്തേ പ്രതിഷേധത്തിനിടെ നടന്ന രീതിയില്‍ വാഹനപരിശോധനയോ പ്രതിഷേധമോ അനുവദിക്കരുതെന്നും ആഭ്യന്തര വകുപ്പ് നിര്‍ദ്ദേശം നടത്തിയിട്ടുണ്ട്.

അതേസമയം, വിശ്വാസത്തിന് കോട്ടം വരുന്ന രീതിയിലുള്ള നടപടികള്‍ ഉണ്ടാകരുതെന്ന് പോലീസുകാര്‍ക്ക് നിര്‍ദേശമുണ്ട്. ഇരുമുടിക്കെട്ടില്ലാത്തവരെ പ്രത്യേകം പരിശോധിച്ച ശേഷമായിരിക്കും മല കയറാൻ അനുവദിക്കുക. തീര്‍ഥാടകരുടെ കൈവശം എന്തെങ്കിലും തിരിച്ചറിയൽ കാര്‍ഡ് ഉണ്ടായിരിക്കണമെന്നും നിര്‍ദേശമുണ്ട്. മുൻപ് നടന്ന പ്രതിഷേധങ്ങളിൽ അറസ്റ്റിലായവര്‍ ആരെങ്കിലും ക്യാമറയിൽ പതിഞ്ഞാൽ കസ്റ്റഡിയിൽ എടുക്കാനാണ് തീരുമാനം.