ശബരിമല തന്ത്രി താഴമൺമഠം കണ്ഠര് മഹേശ്വരര് അന്തരിച്ചു

ആലപ്പുഴ: ശബരിമല വലിയ തന്ത്രി താഴമൺ മഠം കണ്ഠര് മഹേശ്വരര് (91) നിര്യാതനായി. വസതിയായ ചെങ്ങന്നൂരിലെ താഴമൺ മഠത്തിലായിരുന്നു അന്ത്യം. വാർധക്യസഹജമായ രോഗങ്ങളെത്തുടർന്നു ചികിത്സയിലായിരുന്നു.

പരശുരാമന്റെ കാലത്ത് ആന്ധ്രയിൽനിന്നു കേരളത്തിൽ എത്തിയതെന്നു വിശ്വസിക്കപ്പെടുന്ന താഴമൺ തന്ത്രികുടുംബത്തിലെ കാരണവരാണ്. പതിനേഴാം വയസിൽ ശബരിമലയിലെ താന്ത്രിക കർമങ്ങളിൽ പങ്കാളിയായി തുടങ്ങിയ ഇദ്ദേഹം അച്‌ഛൻ കണ്‌ഠര് പരമേശ്വരരുടെ അനുജൻ കണ്‌ഠര് ശങ്കരരോടൊപ്പമാണു ആദ്യമായി ശബരിമലയിലെത്തിയത്.

കുടുംബത്തിലെ പതിവനുസരിച്ചു പന്ത്രണ്ടാം വയസ്സിൽ ചെങ്ങന്നൂർ മഹാദേവർ ക്ഷേത്രത്തിൽ ആദ്യപൂജ. കേരളത്തിനകത്തും പുറത്തുമായി മുന്നൂറോളം ക്ഷേത്രങ്ങളില്‍ പ്രതിഷ്ഠ നടത്തിയിട്ടുള്ള ഇദ്ദേഹത്തിന്‌ എഴുന്നൂറോളം ക്ഷേത്രങ്ങളില്‍ താന്ത്രികാവകാശമുണ്ട്‌.