തന്നെ ശബരിമലയിൽ കയറ്റുമോ എന്ന് ചോദിച്ച് തസ്ലീമ നസ്രീൻ

ന്യൂഡൽഹി: ശബരിമലയിൽ സ്ത്രീകളെ പ്രവേശിപ്പിക്കുന്നതിന് എതിരെ നടക്കുന്ന സമരങ്ങളെ വിമർശിച്ച് സാഹിത്യകാരി തസ്ലീമ നസ്രീൻ. തനിക്ക് 56 വയസായി. ശബരിമലയിൽ കയറാൻ പറ്റുമോ? എന്നാണ് തസ്ലീമ ട്വിറ്ററിൽ ചോദിച്ചിരിക്കുന്നത്. താൻ നിരീശ്വരവാദിയാണെന്നും തസ്ലീമ ട്വീറ്റ് ചെയ്തിട്ടുണ്ട്.



ശബരിമലയിൽ എത്തിയ രഹന ഫാത്തിമ ആക്ടിവിസ്റ്റാണെന്ന കാരണത്താൽ സന്നിധാനത്തേക്ക് പ്രവേശനം നൽകിയില്ല. കൂടെ ഉണ്ടായിരുന്ന മാധ്യമപ്രവർത്തക കവിത ജക്കാലക്കും ഇന്നലെ പ്രവേശനം നിഷേധിച്ചിരുന്നു. ആക്റ്റിവിസ്റ്റുകൾക്ക് ശക്തി തെളിയിക്കാനുള്ള സ്ഥലമല്ല ശബരിമലയെന്ന് മന്ത്രി കടകംപള്ളി സുരേന്ദ്രൻ വ്യക്തമാക്കിയിരുന്നു. തുടർന്ന് ഇന്ന് രാവിലെ തിരുച്ചിറപ്പള്ളി സ്വദേശി ലതയെ ശബരിമലയിൽ തടഞ്ഞത് വലിയ വിവാദത്തിന് ഇടയാക്കിയിരുന്നു.

52 വയസായി എന്ന് രേഖകൾ കാണിച്ചിട്ടും കുടുംബത്തോടൊപ്പം എത്തിയ ലതയെ നിരവധി പേർ തടയാൻ ശ്രമിച്ചിരുന്നു. വൈകുന്നേരം മല കയറാൻ എത്തിയ കേരള ദളിത് മഹിളാ ഫെഡറേഷൻ പ്രസിഡന്റ് മഞ്ചുവിന് സുരക്ഷ നൽകാൻ കഴിയില്ല എന്ന് പോലീസ് അറിയിച്ചതോടെ മഞ്ചു മടങ്ങി പോകാൻ തീരുമാനിച്ചു. കനത്ത മഴയും മഞ്ചുവിന്റെ പശ്ചാത്തലവും പരിഗണിച്ചാണ് പോലീസ് ഇങ്ങനെയൊരു നിലപാടെടുത്തത്. മഞ്ചുവിനെതിരെ വിവിധ പോലീസ് സ്റ്റേഷനുകളിലായി 12 ഓളം കേസുകൾ നിലനിൽക്കുന്നുവെന്നാണ് പോലീസ് വെളിപ്പെടുത്തൽ. സ്ത്രീകൾക്ക് ശബരിമലയിൽ പ്രവേശിക്കാം എന്ന് സുപ്രീം കോടതി വിധി ഇത് വരെ നടപ്പാകാത്ത സാഹചര്യത്തിലാണ് തസ്ലീമയുടെ ട്വീറ്റ് ശ്രദ്ധേയമാകുന്നത്.