ഇന്ന് അർധരാത്രി മുതൽ 24 മണിക്കൂർ ഹർത്താൽ

തിരുവനന്തപുരം: ശബരിമലയിൽ സ്ത്രീകളെ പ്രവേശിപ്പിക്കണമെന്ന സുപ്രീംകോടതി വിധി നടപ്പാക്കാനുള്ള സര്‍ക്കാര്‍ നീക്കത്തിനെതിരെ ഹര്‍ത്താലിന് ആഹ്വാനം. ശബരിമല സംരക്ഷണസമിതിയാണ് ഹര്‍ത്താലിന് ആഹ്വാനം ചെയ്തിരിക്കുന്നത്. 24 മണിക്കൂറായിരിക്കും ഹര്‍ത്താൽ. ഇന്നു രാത്രി 12 മുതൽ നാളെ രാത്രി 12 വരെ ഹര്‍ത്താൽ ആചരിക്കുമെന്ന് ശബരിമല സംരക്ഷണസമിതി വ്യക്തമാക്കി.

അതിനിടെ നിലയ്ക്കലിൽ സമരം നടത്തിയവരെ പോലീസ് സമരപ്പന്തൽ പൊളിച്ചുനീക്കി ഒഴിപ്പിച്ചു. സ്ഥലത്ത് സംഘര്‍ഷാവസ്ഥയും പ്രതികൂല സാഹചര്യവും ഒഴിവാക്കുന്നതിൻ്റെ ഭാഗമായായിരുന്നു പോലീസ് നടപടി. ആചാര സംരക്ഷണ സമിതിയുടെ നേതൃത്വത്തില്‍ പ്രതിഷേധം നടത്തിവന്ന സമരപ്പന്തലാണ് പോലീസ് പൊളിച്ചുമാറ്റിയത്. തുടര്‍ന്ന് പ്രതിഷേധക്കാര്‍ ചിതറിയോടുകയായിരുന്നു. നിലവിൽ നിലയ്ക്കലിൽ സ്ഥിതിഗതികൾ ശാന്തമാണ്.

അതേസമയം തുലാമാസ പൂജകൾക്കായി ഇന്ന് വൈകിട്ട് അഞ്ച് മണിയോടെ ശബരിമല സന്നിധാനത്ത് നടതുറക്കും.