പതിനെട്ടാം പടിയിൽ ആചാര ലംഘനം നടത്തിയെന്നു സമ്മതിച്ച് വത്സൻ തില്ലങ്കേരി

സന്നിധാനം: ശബരിമലയിൽ താൻ ആചാര ലംഘനം നടത്തിയെന്ന് ആർഎസ്എസ് നേതാവ് വത്സൻ തില്ലങ്കേരി. ഇരുമുടിക്കെട്ടില്ലാതെ പതിനെട്ടാം പടിയിൽ നിന്നത് അറിവില്ലായ്മകൊണ്ടാണെന്നും മനോരമ ന്യൂസ് പരിപാടിയായ കൌണ്ടർ പോയിന്റിൽ അദ്ദഹം പറഞ്ഞു. ആചാര സംരക്ഷണത്തിന്റെ പേരിൽ സന്നിധാനത്ത് സംഘടിച്ച സംഘപരിവാർ പ്രവർത്തകർക്ക് നേതൃത്വം നൽകിയത് വത്സൻ തില്ലങ്കേരിയായിരുന്നു.

പതിനെട്ടാം പടിയിൽ സന്നിധാനത്തിന് പുറംതിരിഞ്ഞു നിന്ന് പ്രതിഷേധക്കാരോട് സംസാരിച്ച വത്സന്റെ നടപടി വിമർശനത്തിന് ഇടയാക്കിയിരുന്നു. ഇരുമുടിക്കെട്ടില്ലാതെ പതിനെട്ടാം പടികയറിയ വത്സനെതിരെ തന്ത്രി കണ്ഠര് രാജീവര് രംഗത്തെത്തിയിരുന്നു. തന്ത്രിയും രാജകുടുംബാംഗങ്ങളും മാത്രമേ ഇരുമുടിക്കെട്ടില്ലാതെ പതിനെട്ടാം പടി ചവിട്ടാവൂ എന്നതാണ് ശബരിമലയിലെ ആചാരമെന്നും അദ്ദേഹം പറഞ്ഞു.

താൻ ആചാര ലംഘനം നടത്തിയിട്ടില്ലെന്നായിരുന്നു വത്സൻ തില്ലങ്കേരി ആദ്യം പ്രതികരിച്ചത്. ഇരുമുടിക്കെട്ടുമായി പടി കയറുകയായിരുന്നെന്നും ബഹളം കേട്ട് തിരിച്ചിറങ്ങുകയായിരുന്നുവെന്നുമായിരുന്നു വത്സന്റെ പ്രതികരണം. ആചാര ലംഘനം നടത്തിയെന്ന് ആർക്കെങ്കിലും തോന്നുന്നുണ്ടെങ്കിൽ പ്രാശ്ചിത്വം നടത്താൻ തയ്യാറാണെന്നും വീഡിയോ ദൃശ്യങ്ങൾ പരിശോധിക്കാമെന്നും വത്സൻ പറഞ്ഞിരുന്നു.

അതേസമയം പതിനെട്ടാം പടിയിൽ സന്നിധാനത്തിനു പുറം തിരിഞ്ഞുനിന്ന് പ്രസംഗിക്കുന്ന വത്സൻ തില്ലങ്കേരിയുടെ ദൃശ്യങ്ങൾ വാർത്താ മാധ്യമങ്ങൾ പുറത്തുവിട്ടിരുന്നു.