Saji Cherian: വിജയം ഉറപ്പിച്ച് സജി ചെറിയാൻ; 'വിജയം സര്‍ക്കാരിനുള്ള അംഗീകാരം'

ചെങ്ങന്നൂര്‍: ഉപതെരഞ്ഞെടുപ്പിൽ വിജയം ഉറപ്പിച്ച് എൽഡിഎഫ് സ്ഥാനാര്‍ഥി സജി ചെറിയാൻ. കേരള കോൺഗ്രസിന്‍റെയും ബിഡിജെഎസിന്‍റെയും പിന്തുണ ഉണ്ടായിരുന്നുവെന്ന് സജി ചെറിയാൻ പറഞ്ഞു. നിലവിൽ 7158 വോട്ടുകളുടെ വൻ ലീഡാണ് സജി ചെറിയാനുള്ളത്.

യുഡിഎഫ് ഭരിക്കുന്ന പഞ്ചായത്തുകളായ മാന്നാറും പാണ്ടനാടും എൽഡിഎഫ് ലീഡ് ചെയ്തു. ഇതോടൊപ്പം മിക്ക യുഡിഎഫ് ശക്തികേന്ദ്രങ്ങളിലും കോൺഗ്രസിന് കാലിടറി.

കെഎം മാണിയുടെ മനസ് തനിക്കൊപ്പമായിരുന്നുവെന്ന് സജി ചെറിയാൻ മാധ്യമങ്ങളോടു പറഞ്ഞു. കേരള കോൺഗ്രസ് ഭരിക്കുന്ന പഞ്ചായത്തും ബിജെപി ശക്തി കേന്ദ്രവുമായ തിരുവൻവണ്ടൂരിൽ എൽഡിഎഫ് ലീഡ് ചെയ്തത് ഇതിനു തെളിവായി സജി ചെറിയാൻ ഉയര്‍ത്തിക്കാട്ടി.

വെള്ളാപ്പള്ളി നടേശന്‍റെയും ബിഡിജെഎസിന്‍റെയും പിന്തുണ ഉണ്ടായിരുന്നതായും സജി ചെറിയാൻ വെളിപ്പെടുത്തി. ഇതോടൊപ്പം തനിക്ക് കോൺഗ്രസ്, ബിജെപി വോട്ടുകളും കിട്ടിയതായും സജി ചെറിയാൻ അവകാശപ്പെട്ടു. പിണറായി സര്‍ക്കാരിനുള്ള അംഗീകാരമാണ് തന്‍റെ വിജയമെന്നും അദ്ദേഹം അഭിപ്രായപ്പെട്ടു.

അതേസമയം, ബിജെപി സിപിഎമ്മിന് വോട്ട് മറിച്ചെന്ന ആരോപണവുമായി കോൺഗ്രസും സിപിഎമ്മിനെ കോൺഗ്രസ് സഹായിച്ചെന്ന ആരോപണവുമായി ബിജെപിയും രംഗത്തെത്തി.