Neyyattinkara Murder: പൊലീസ് ഒത്തുകളിക്കുന്നെന്ന് സനലിന്റെ അമ്മ

തിരുവനന്തപുരം: നെയ്യാറ്റൻകര കൊലപാതക കേസിൽ പൊലീസിനെതിരെ സനലിന്റെ അമ്മ. കേസിൽ പ്രതിയായ ഡിവൈഎസ്പി ഹരികുമാർ പൊലീസിന്റെ സംരക്ഷണത്തിലാണെന്ന് സനൽ കുമാറിന്റെ അമ്മ രമണി ആരോപിച്ചു. ഹരികുമാറിന്റെ അറസ്റ്റ് ഉണ്ടായില്ലെങ്കിൽ സനൽ കൊല്ലപ്പെട്ട സ്ഥലത്ത് സമരം ആരംഭിക്കുമെന്നും അവർ പറഞ്ഞു.

അന്വേഷണ സംഘത്തിനെതിരെ സനലിന്റെ ഭാര്യ വിജി നേരത്തെ രംഗത്തെത്തിയിരുന്നു. ക്രൈം ബ്രാഞ്ച് അന്വേഷണത്തിൽ കാര്യമില്ലെന്നും ഐപിഎസ് നേടിയ ഉദ്യോഗസ്ഥർ കേസ് നേരിട്ട് അന്വേഷിക്കണമെന്നും അവർ പറഞ്ഞു.

അതേസമയം, സനൽ കൊല്ലപ്പെട്ടത് തലയ്ക്കേറ്റ ക്ഷതം മൂലമാണെന്ന് പോസ്റ്റ് മോർട്ടം റിപ്പോർട്ട് പുറത്തുവന്നു. സനലിന്റെ തുടയ്ക്കും വാരിയെല്ലിനും കവിളെല്ലിനും പൊട്ടലുണ്ടായിരുന്നു. ശരീരമാകെ ക്ഷതമേറ്റിരുന്നെന്നും ആന്തരിക രക്തശ്രാവം ഉണ്ടായിരുന്നതായും പോസ്റ്റ്മോർട്ടം റിപ്പോർട്ടിൽ പറയുന്നു.

തിരുവനന്തപുരം ജില്ലാ സെക്ഷൻസ് കോടതിയിൽ ഡിവൈഎസ്പി ഹരികുമാർ ജാമ്യാപേക്ഷ സമർപ്പിച്ചു. നെയ്യാറ്റിൻകര ജനറൽ ആശുപത്രിയിൽനിന്നും മെഡിക്കൽ കോളജിലേക്ക് കൊണ്ടുപോൻ നിർദ്ദേശിച്ചെങ്കിലും ആദ്യം പൊലീസ് സ്റ്റേഷനിലേക്കാണ് ആമ്പുലൻ പോയതെന്ന് ഡ്രൈവർ വെളിപ്പെടുത്തിയിരുന്നു. ഇതേത്തുടർന്ന് രണ്ട് പൊലീസുകാരെ സസ്പെന്റ് ചെയ്തിട്ടുണ്ട്.