ആർഭാടമില്ലാതെ സ്‌കൂൾ കലോത്സവം ആലപ്പുഴയിൽ നടത്തും

തിരുവനന്തപുരം: സംസ്ഥാന സ്‌കൂൾ കലോത്സവം ഡിസമ്പറിൽ ആലപ്പുഴയിൽ വെച്ച് നടക്കുമെന്ന് വിദ്യാഭ്യാസവകുപ്പ് മന്ത്രി പ്രൊഫ.സി.രവീന്ദ്രനാഥ് അറിയിച്ചു.പ്രളയം ബാധിച്ചതിനാൽ സ്‌കൂൾ കലോത്സവം ഉൾപ്പടെയുള്ള ആഘോഷ പരിപാടികൾ ഈ വർഷം നടത്തേണ്ട എന്ന് നേരത്തെ മന്ത്രിസഭ തീരുമാനിച്ചിരുന്നു. ആ തീരുമാനം പുനഃപരിശോധിച്ച ശേഷമാണ് മന്ത്രി കലോത്സവം നടക്കുമെന്ന് ഇപ്പോൾ അറിയിച്ചിരിക്കുന്നത്.

സ്‌കൂൾ കായികമേള ഈ വർഷം ഒക്ടോബറിൽ തിരുവനന്തപുരത്തും നവമ്പറിൽ കണ്ണൂർ വെച്ച് ശാസ്ത്രോത്സവവും ഒക്ടോബർ അവസാനം കൊല്ലത്ത് വെച്ച് സ്‌പെഷ്യൽ സ്‌കൂൾ കലോത്സവവും നടക്കും. പ്രളയം ഉണ്ടായ സാഹചര്യത്തിൽ മേളകളുടെ ഉദ്‌ഘാടന സമാപന ചടങ്ങുകൾ ഒഴിവാക്കാൻ തീരുമാനിച്ചു.

മേളകളിൽ കുടുംബശ്രീ വഴി ഭക്ഷണം നൽകുമെന്നും മന്ത്രി അറിയിച്ചു. ആർഭാടങ്ങൾ ഒഴിവാക്കിയാലും മത്സരാർത്ഥികൾക്ക് ബുദ്ധിമുട്ട് നേരിടില്ലെന്ന് മന്ത്രി ഉറപ്പു നൽകി. രാത്രി വൈകി മത്സരങ്ങൾ നടക്കുന്നത് പരമാവധി ഒഴിവാക്കും. നിലവിലെ ഗ്രെയ്‌സ് മാർക്ക് സംവിധാനത്തിൽ തന്നെ മുന്നോട്ട് പോകും. കായികാദ്ധ്യാപകർ ഓണറേറിയം ഒഴിവാക്കണമെന്ന് പറഞ്ഞത് പരിഗണിക്കുമെന്നും മന്ത്രി വ്യക്തമാക്കി.