മഹാപ്രളയത്തിനുശേഷം സ്‌കൂളുകള്‍ തുറന്നു

തിരുവനന്തപുരം:കേരളത്തിലുണ്ടായ മഹാപ്രളയത്തിനു ശേഷം സ്‌കൂളുകള്‍ ഇന്ന് തുറന്നു.മിക്കയിടങ്ങളിലും പ്രവേശനോല്‍സവം സംഘടിപ്പിച്ച് സൗഹൃദാന്തരീക്ഷം അന്തരീക്ഷം സൃഷ്ടിച്ചാണ് സ്‌കൂളുകള്‍ തുറന്നത്. മഴക്കെടുതി മൂലം ഇത്തവണ ഓണാവധിയും നേരത്തേ നല്‍കിയിരുന്നു. പ്രളയബാധിത മേഖലകളിലെ സ്‌കൂളുകളിലും ക്യാമ്പുകളായി പ്രവര്‍ത്തിച്ച സ്‌കൂളുകളിലും ശുചീകരണം നടത്തിയ ശേഷമാണ് ഇന്ന് തുറക്കാനായിരിക്കുന്നത്.

ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്നവ ഉള്‍പ്പെടെയുളള 211 സ്‌കൂളുകള്‍ ഇന്ന് തുറക്കില്ല.ആലപ്പുഴയില്‍ കുട്ടനാട്,അമ്പലപ്പുഴ,ചേര്‍ത്തല താലൂക്കുകളില്‍ പ്രൊഫഷണല്‍ കോളേജ് അടക്കമുളള എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധിയും പ്രഖ്യാപിച്ചിട്ടുണ്ട്.കനത്ത മഴമൂലം കുട്ടനാട്ടില്‍ ഏറെ അധ്യായന ദിവസങ്ങള്‍ ഇത്തവണ നഷ്ടപ്പെട്ടിട്ടുണ്ട്.

പ്രളയം ബാക്കിവച്ച മാനസിക പ്രതിസന്ധികളില്‍നിന്നും കുട്ടികളെ കരകയറ്റാനാണ് ഇന്ന് മുതല്‍ അധ്യാപകരടക്കം ശ്രമിക്കുന്നത്.പല സ്‌കൂളുകളിലും കൗൺസലിംഗ് ഉള്‍പ്പെടെ കുട്ടികള്‍ക്കായുണ്ട്. പാഠപുസ്തകങ്ങളും യൂണിഫോമും നഷ്ടപ്പെട്ട കുട്ടികള്‍ക്ക് നാളെ മുതല്‍ വിതരണം ചെയ്യുമെന്നാണ് അറിയുന്നത്.