ദുൽഖ‍ര്‍ ചിത്രങ്ങളുടെ തിരക്കഥാകൃത്തിന് മൂന്നര വര്‍ഷം തടവ്

കൊച്ചി: യുവതിയെ കടന്നുപിടിച്ചെന്ന കേസില്‍ തിരക്കഥാകൃത്തായ മുഹമ്മദ് ഹാഷിറിനെ മൂന്നരവര്‍ഷത്തെ തടവിന് ശിക്ഷ വിധിച്ചു. വിവിധ വകുപ്പുകളിലായി എറണാകുളം അഡീഷനല്‍ സെഷന്‍സ് കോടതി മൂന്നരവര്‍ഷം തടവും 40,000 രൂപ പിഴയുമാണ് വിധിച്ചത്. ശിക്ഷ ഒരുമിച്ച്‌ രണ്ടുവര്‍ഷം അനുഭവിച്ചാല്‍ മതിയെന്ന് കോടതി നിര്‍ദേശിച്ചു.

സമീര്‍ താഹിറിന്‍റെ സംവിധാനത്തില്‍ ദുല്‍ഖര്‍ നായകനായ നീലാകാശം പച്ചക്കടല്‍ ചുവന്നഭൂമി, അഞ്ചു സുന്ദരികള്‍ എന്ന ചിത്രത്തിലെ ആമി എന്നിവയുടെ തിരക്കഥകൾ ഒരുക്കിയത് ഹാഷിര്‍ മുഹമ്മദാണ്. പ്രായമായ മാതാപിതാക്കളുടെ ഏക ആശ്രയം താനാണെന്ന് പ്രതി കോടതിയെ ബോധിപ്പിച്ചു. മുന്‍പ് ഇത്തരം കുറ്റകൃത്യങ്ങളില്‍ പ്രതി ഏര്‍പ്പെട്ടിട്ടില്ല എന്നത് കോടതി നിരീക്ഷിച്ചു. ഇക്കാര്യം പ്രത്യേകമായി പരിഗണിച്ചാണ് ശിക്ഷ കോടതി മൂന്നുവര്‍ഷമായി വെട്ടിക്കുറച്ചത്.

പിഴസംഖ്യ അടച്ചില്ലെങ്കില്‍ ആറുമാസം അധിക തടവ് കൂടി അനുഭവിക്കേണ്ടി വരും. 2014 ഫെബ്രുവരി 28നായിരുന്നു കേസിനാസ്പദമായ സംഭവം. കൊച്ചിയിലെ മരടിലെ ഒരു ഫ്ളാറ്റില്‍ വെച്ച്‌ സമീപത്തെ ഫ്ളാറ്റില്‍ താമസിച്ചിരുന്ന യുവതിയെ ഹാഷിര്‍ കയറിപിടിച്ചെന്നതാണ് കേസ്. യുവതിയുടെ പരാതിയില്‍ പോലീസ് ഇയാളെയും കസ്റ്റഡിയില്‍ എടുക്കുകയും ഇയാളുടെ ഫ്ലാറ്റില്‍ നിന്ന് കഞ്ചാവും പിടിച്ചെടുത്തിരുന്നു.

മരട് പൊലീസ് കസ്റ്റഡിയില്‍ എടുത്തപ്പോള്‍ ചോദ്യം ചെയ്യലില്‍ ഹാഷിര്‍ മുഹമ്മദ് വിചിത്ര പരമായായിരുന്നു മറുപടി നല്‍കിയത്. ദൈവത്തിന്‍റെ നിര്‍ദേശപ്രകാരമാണ് താന്‍ യുവതിയെ കയറിപിടിച്ചതെന്നും ഏഴു പാപങ്ങള്‍ ചെയ്യാനുളള ദൈവത്തിന്‍റെ നിര്‍ദേശം പിന്തുടരുക മാത്രമാണ് താന്‍ ചെയ്തതെന്നുമായിരുന്നു ഇയാൾ പോലീസിന് നല്‍കിയ മറുപടി.

Scriptwriter Hashir Mohamed got three and half years imprisonment

Dulquer Movie's Scriptwriter Hashir Mohamed got three and half years imprisonment for Molestation