നാളെ സംസ്ഥാനത്ത് എസ്‍ഡിപിഐ ഹര്‍ത്താല്‍

കൊച്ചി: എസ്‍.ഡി.പി.ഐ സംസ്ഥാന പ്രസിഡന്‍റ് ഉള്‍പ്പെടെയുള്ള നേതാക്കളെ പോലീസ് കസ്റ്റഡിയില്‍ എടുത്തതില്‍ പ്രതിഷേധിച്ച് ചൊവ്വാഴ്‍ച്ച സംസ്ഥാന വ്യാപക ഹര്‍ത്താല്‍ നടത്തുമെന്ന് എസ്‍ഡിപിഐ വാര്‍ത്താക്കുറിപ്പില്‍ അറിയിച്ചു.

രാവിലെ ആറ് മുതല്‍ വൈകുന്നേരംആറ് മണിവരെയാണ് ഹര്‍ത്താല്‍. പാല്‍, പത്രം, ആശുപത്രി എന്നിവ ഹര്‍ത്താലില്‍ നിന്നും ഒഴിവാക്കും

തിങ്കളാഴ്‍ച്ച എറണാകുളം പ്രസ്‍ ക്ലബില്‍ വാര്‍ത്താസമ്മേളനം നടത്തിയ ശേഷം പുറത്തിറങ്ങിയ എസ്‍ഡിപിഐ സംസ്ഥാന പ്രസിഡന്‍റ് അബ്ദുല്‍ മജീദ് ഫൈസി, വൈസ് പ്രസിഡന്‍റ്‍ എം.കെ മനോജ് കുമാര്‍, ജനറല്‍ സെക്രട്ടറി റോയി അറയ്ക്കല്‍, എറണാകുളം ജില്ലാ പ്രസിഡന്‍റ്‍ ഷൗക്കത്തലി തുടങ്ങിയ നേതാക്കളെയാണ് പോലീസ് കസ്റ്റഡിയില്‍ എടുത്തത്.

മഹാരാജാസ് കോളേജിലെ വിദ്യാര്‍ഥി അഭിമന്യുവിന്‍റെ കൊലപാതകത്തെ സംബന്ധിച്ചുള്ള വിവരങ്ങള്‍ അറിയാനാണ് ഇവരെ കസ്റ്റഡിയില്‍ എടുത്തതെന്ന് വിവിധ മാധ്യമങ്ങള്‍ റിപ്പോര്‍ട്ട് ചെയ്‍തിരുന്നു.