ജേക്കബ് തോമസിന്‍റെ രണ്ടാം പുസ്തകവും പുറത്തിറങ്ങി

തിരുവനന്തപുരം: ആദ്യ പുസ്തകത്തെക്കുറിച്ചുള്ള വിവാദങ്ങള്‍ അവസാനിക്കുന്നതിനു മുൻപ് രണ്ടാമത്തെ പുസ്തകവുമായി ജേക്കബ് തോമസ്. പാറ്റൂര്‍ ഭൂമിയിടപാടുകേസ്, ഇടതുപക്ഷത്തിന്‍റെ മദ്യനയം, എംഎം മണിയുടെ ശരീരഭാഷ എന്നിങ്ങനെ വിവാദവിഷയങ്ങള്‍ക്ക് പുതിയ പുസ്തകത്തിലും ക്ഷാമമില്ല. നേരിട്ട വെല്ലുവിളികള്‍ കാര്യവും കാരണവും എന്നാണ പുസ്തകത്തിന്‍റെ പേര്.

ഒദ്യോഗികജീവിതത്തിലെ വെല്ലുവിളികളാണ് പുതിയ പുസ്തകത്തിലൂടെ ജേക്കബ് തോമസ് തുറന്നെഴുതുന്നത്. ഇ പി ജയരാജനെതിരായ ബന്ധുനിയമനകേസ് നിലനിൽക്കുന്നതാണെന്നും 2016ൽ തമിഴ്നാട്ടിൽ സമാനമായ ഒരു കേസിൽ കോടതി വിധിയുണ്ടായിട്ടുണ്ടെന്നും ജേക്കബ് തോമസ് പറയുന്നു.

തന്നെ വിജിലൻസിന്‍റെ തലപ്പത്തെത്തിച്ചത് ഏറെ ആലോചനകള്‍ക്കു ശേഷമാണെന്നും എന്നാൽ അഴിമതിക്കാര്‍ക്കു കുടപിടിക്കാത്തതിനാൽ തന്നെ ഒഴിവാക്കാൻ ഒട്ടും അമാന്തിച്ചില്ലെന്നും ജേക്കബ് തോമസ് പറയുന്നു. ഷാര്‍ജ പുസ്തകോത്സവത്തിൽ നടന്ന ചടങ്ങിൽ സാഹിതയകാരൻ സി രാധാകൃഷ്ണന് നല്‍കിയാണ് പുസ്തകം പ്രകാശനം ചെയ്തത്.