മൂന്നാര്‍ കയ്യേറ്റം ഒഴിപ്പിക്കല്‍: സബ് കളക്ടര്‍ക്ക് സുരക്ഷ ശക്തമാക്കി

തിരുവനന്തപുരം: മൂന്നാറില്‍ ഭൂമി കയ്യേറ്റം ഒഴിപ്പിക്കാനെത്തുന്ന റവന്യൂ സംഘത്തിന് പോലീസ് സുരക്ഷ ശക്തമാക്കി. സബ് കളക്ടര്‍ ഉള്‍പ്പെടെയുള്ള ഉദ്യോഗസ്ഥര്‍ക്ക് ഇനിമുതല്‍ ഒരു സിഐ ഉള്‍പ്പെടെയുള്ള എട്ട് പോലീസുകാരുടെ സംരക്ഷണം ഉണ്ടാകും. കഴിഞ്ഞ ദിവസം കയ്യേറ്റം ഒഴിപ്പിക്കുന്നതിനിടെ സംഘര്‍ഷം ഉണ്ടായതിന്‍റെ പശ്ചാത്തലത്തിലാണ് സുരക്ഷ വര്‍ധിപ്പിച്ചത്.

അതിനിടെ, കഴിഞ്ഞ ദിവസം ദേവികുളത്ത് കയ്യേറ്റം ഒഴിപ്പിക്കുന്നതിനിടെ സംഘര്‍ഷം ഉണ്ടായ സംഭവത്തില്‍ പോലീസിന് വീഴ്‍ച പറ്റിയിട്ടില്ലെന്നു കാണിച്ച് ജില്ലാ പോലീസ് മേധാവി കെബി വേണുഗോപാല്‍ റിപ്പോര്‍ട്ട് നല്‍കി. കയ്യേറ്റം ഒഴിപ്പിക്കാനെത്തിയ സബ് കളക്ടര്‍ ഉള്‍പ്പെടെയുള്ള സംഘത്തെ സിപിഎം പ്രവര്‍ത്തകര്‍ തടയുകയും ഭൂസംരക്ഷണ സേനാംഗത്തെ മര്‍ദ്ദിക്കുകയും ചെയ്‍തിരുന്നു. പക്ഷേ, ഇവര്‍ക്കെതിരെ നടപടിയെടുക്കുന്നതില്‍ പോലീസിന് വീഴ്‍ച പറ്റിയെന്നാണ് സബ് കളക്ടറും കളക്ടറും നല്‍കിയ റിപ്പോര്‍ട്ട്.

എന്നാല്‍, പോലീസ് എത്തുന്നതിനു മുന്‍പാണ് സംഘര്‍ഷം നടന്നത് എന്നാണ് എസ്‍പിയുടെ റിപ്പോര്‍ട്ടില്‍ പറയുന്നത്. പോലീസിനെ അറിയിക്കാതെയാണ് റവന്യൂ സംഘം കയ്യേറ്റം ഒഴിപ്പിക്കാന്‍ പോയത്. പിന്നീട് സംഘര്‍ഷം ഉണ്ടായപ്പോളാണ് പോലീസിനെ അറിയിച്ചതെന്നും റിപ്പോര്‍ട്ടില്‍ പറയുന്നു.

Security enhanced for Sub-collector

Security of Revenue Officials including Sub Collector involved in anti-encroachment drive in Munnar.