മുതിര്‍ന്ന കോൺഗ്രസ് നേതാവ് എം എം ജേക്കബ് അന്തരിച്ചു

പാലാ: മുതിര്‍ന്ന കോൺഗ്രസ് നേതാവും മുൻ കേന്ദ്ര ആഭ്യന്തര സഹമന്ത്രിയുമായ എം എം ജേക്കബ് (92) അന്തരിച്ചു. വാര്‍ധക്യസഹജമായ അസുഖത്തെത്തുടര്‍ന്ന് പാലായിലെ സ്വകാര്യ ആശുപത്രിയിലായിരുന്നു അന്ത്യം.

രണ്ട് തവണ മേഘാലയ ഗവര്‍ണറായിരുന്ന എം എം ജേക്കബ് രാജ്യസഭാ ഡെപ്യൂട്ടി ചെയര്‍മാനായും പ്രവര്‍ത്തിച്ചിട്ടുണ്ട്. കുറച്ചുകാലം അരുണാചൽ പ്രദേശ് ഗവര്‍ണറായും പ്രവര്‍ത്തിച്ചിട്ടുണ്ട്.

പ്രഥമപ്രധാനമന്ത്രി ജവഹര്‍ലാൽ നെഹ്റുവിന്‍റെ നേതൃത്വത്തിലുള്ള ഭാരത് സേവക് സമാജത്തിലൂടെയായിരുന്നു എം എം ജേക്കബിന്‍റെ രാഷ്ട്രീയപ്രവേശനം. കേരള സര്‍ക്കാര്‍ നിയന്ത്രണത്തിലുള്ള പ്ലാൻ്റേഷൻ കോര്‍പ്പറേഷൻ, ഓയിൽ പാം ഇന്ത്യ ലിമിറ്റഡ് എന്നിവയുടെ ഡയറക്ടറായും ഹിന്ദുസ്ഥാൻ ലാറ്റക്സ്, ഇന്ത്യൻ റബര്‍ ബോര്‍ഡ്, ഇന്ത്യൻ കോഫി ബോര്‍ഡ് എന്നിവയുടെ ബോര്‍ഡ് അംഗമായും പ്രവര്‍ത്തിച്ചിട്ടുണ്ട്.

സ്വകാര്യ ആശുപത്രിയിൽ സൂക്ഷിച്ചിരിക്കുന്ന മൃതദേഹം ഉടൻ രാമപുരത്തെ വസതിയിലേയ്ക്ക് കൊണ്ടുപോകും. സംസ്കാരം നാളെ.