'പിണറായിയോടു മാപ്പ് പറയണം', 'കമ്മ്യൂണിസ്റ്റുകാരനായി മരിക്കണം': ബർലിൻ കുഞ്ഞനന്തൻ നായർ

കണ്ണൂര്‍: മുഖ്യമന്ത്രി പിണറായി വിജയനെ കണ്ട് മാപ്പ് പറയണമെന്ന് ബര്‍ലിൻ കുഞ്ഞനന്തൻ നായര്‍. തന്‍റെ പഴയ നിലപാടിൽ കുറ്റബോധമുണ്ടെന്നും പിണറായി വിജയനാണ് ശരിയെന്നു തെളിഞ്ഞെന്നും ബര്‍ലിൻ കുഞ്ഞനന്തൻ നായര്‍ പറഞ്ഞു. ചില മലയാളം വാര്‍ത്താ ചാനലുകളോട് പ്രതികരിക്കുമ്പോഴായിരുന്നു അദ്ദേഹം ഇക്കാര്യം വ്യക്തമാക്കിയത്.

ഒരു കമ്മ്യൂണിസ്റ്റുകാരനായി മരിക്കണമെന്നാണ് തന്‍റെ ആഗ്രഹമെന്ന് ബര്‍ലിൻ കു‍ഞ്ഞനന്തൻ നായര്‍ വ്യക്തമാക്കി. 96കാരനായ ബര്‍ലിൻ കു‍ഞ്ഞനന്തൻ നായര്‍ ഏറെക്കാലമായി കണ്ണൂര്‍ നാറാത്തെ വീട്ടിൽ രോഗബാധിതനായി കിടപ്പിലാണ്. പിണറായി വിജയനെ വ്യക്തിപരമായും രാഷ്ട്രീയനിലപാടിൻ്റെ പേരിലും വര്‍ഷങ്ങളോളം വിമര്‍ശിച്ചതിനു ശേഷമാണ് ബര്‍ലിൻ കുഞ്ഞനന്തൻ നായര്‍ നിലപാട് മാറ്റുന്നത്. പാര്‍ട്ടിൽ വിഭാഗീയതയുടെ കാലത്ത് താൻ വിഎസ് അച്യുതാനന്ദനൊപ്പം നിന്നതാണ് പിണറായി വിജയനിൽ നിന്ന് അകലാൻ കാരണമായതെന്നും അദ്ദേഹം മനോരമ ന്യൂസിനോട് വ്യക്തമാക്കി.

Also Read: ബിജെപിയുടെ എ പ്ലസ് മണ്ഡലത്തില്‍ കോണ്‍ഗ്രസ് സുധീരനെ ഇറക്കുമോ? വട്ടിയൂര്‍ക്കാവില്‍ പുതിയ സാധ്യതകള്‍

പാര്‍ട്ടിയിൽ നിന്നു കൊണ്ട് മരിക്കണമെന്നാണ് താൻ ആഗ്രഹിക്കുന്നതെന്ന് അദ്ദേഹം വ്യക്തമാക്കി. തനിക്ക് തെറ്റുപറ്റിയെന്നും തന്‍റെ പുസ്തകത്തിലെ പിണറായിയ്ക്കെതിരായ ഭാഗങ്ങളൊക്കെ പിൻവലിച്ചിട്ടുണ്ടെന്നും അദ്ദേഹം വ്യക്തമാക്കി. തനിക്ക് പാര്‍ട്ടി അംഗത്വം പുതുക്കി തന്നിട്ടുണ്ടെന്നും ഇതിനുള്ള നന്ദി മുഖ്യമന്ത്രിയോട് അറിയിക്കണമെന്നും അദ്ദേഹം വ്യക്തമാക്കി.

Also Read: രാജ്യത്ത് കൊവിഡ് കേസുകൾ കുറയുന്നു; 24 മണിക്കൂറിനിടെ 181 മരണങ്ങൾ

പിണറായി വിജയൻ മുഖ്യമന്ത്രിയായതോടെ പാര്‍ട്ടിൽ ഐക്യവും ശക്തിയും വന്നെന്ന് അദ്ദേഹം അഭിപ്രായപ്പെട്ടു. ഇരുകണ്ണുകള്‍ക്കും കാഴ്ചയില്ലെങ്കിലും പിണറായിയെ നേരിൽ കാണണമെന്നുണ്ടെന്നും കാണാൻ കാഴ്ചയില്ലെങ്കിലും ശബ്ദം കേട്ടാൽ മതിയെന്നും അദ്ദേഹം പറഞ്ഞു. സംസ്ഥാന സര്‍ക്കാരിൻ്റേത് സൂപ്പര്‍ ബജറ്റാണെന്നും അടുത്ത തവണ എൽഡിഎഫ് തന്നെ അധികാരത്തിൽ വരുമെന്നും ബര്‍ലിൻ കുഞ്ഞനന്തൻ നായര്‍ പറഞ്ഞു.