സെര്‍വര്‍ തകരാറിൽ: സംസ്ഥാനത്ത് റേഷൻ വിതരണം തടസ്സപ്പെട്ടു

തിരുവനന്തപുരം: സെര്‍വര്‍ തകരാര്‍ മൂലം സംസ്ഥാനത്ത് റേഷൻ വിതരണം തടസ്സപ്പെട്ടു. ഇ-പോസ് മെഷീനുകള്‍ പ്രവര്‍ത്തിക്കാത്തതുമൂലം റേഷൻ വാങ്ങാനെത്തിയവര്‍ക്ക് സാധനങ്ങള്‍ ലഭിക്കാതെ മടങ്ങേണ്ടി വന്നു. സാങ്കേതിക തകരാര്‍ മൂലം കേന്ദ്രം അനുവദിച്ച അധിക അരിയുടെ വിതരണവും തടസ്സപ്പെട്ടതായി മനോരമ റിപ്പോര്‍ട്ട് ചെയ്തു.

ഇന്നലെ വൈകിട്ട് നാലുമണിയോടെയാണ് സെര്‍വര്‍ തകരാറിലായതെന്നാണ് വ്യാപാരികള്‍ പറയുന്നത്. ഇതോടെ സാധനങ്ങള്‍ വാങ്ങാനെത്തിയവര്‍ ഏറെ നേരം കാത്തുനിന്ന ശേഷം മടങ്ങി. ഇന്നും പല കടകളിലും നീണ്ട ക്യൂ അനുഭവപ്പെട്ടു. എന്നാൽ മെഷീൻ പ്രവര്‍ത്തിക്കാത്തതിനാൽ വ്യാപാരികള്‍ക്ക് റേഷൻ സാധനങ്ങള്‍ വിതരണം ചെയ്യാനായില്ല. ഇതേത്തുടര്‍ന്ന് വ്യാപാരികള്‍ കടകള്‍ അടച്ച് പ്രതിഷേധിച്ചു.