California Fire: കാലിഫോര്‍ണിയ കാട്ടുതീയില്‍ മരണം 71 ആയി

കാലിഫോര്‍ണിയ: കാലിഫോര്‍ണിയയെ ചുട്ടു ചാമ്പലാക്കിക്കൊണ്ടിരിക്കുന്ന കാട്ടുതീയില്‍ മരണപ്പെട്ടവരുടെ എണ്ണം 71 ആയി. ആയിരത്തിലേറെ പേരെയാണ് കാണാതായിരിക്കുന്നതെന്നും അധികൃതര്‍ അറിയിച്ചു. മരണസംഖ്യ ഇനിയും ഉയര്‍ന്നേക്കുമെന്നാണ് സൂചന. കാണാതായവര്‍ക്ക് വേണ്ടിയുള്ള തെരച്ചില്‍ ഊര്‍ജ്ജിതമാക്കിയിട്ടുണ്ട്.

ദുരന്തത്തില്‍ ഭവനരഹിതരായവര്‍ നിരവധിയാണ്. അഭയാര്‍ത്ഥികളായവരെ വിവിധയിടങ്ങളിലായി സജ്ജമാക്കിയ ക്യാമ്പുകളില്‍ പാര്‍പ്പിച്ചിട്ടുണ്ട്. കാണാതായവരുടെ എണ്ണത്തില്‍ വന്‍ വര്‍ധനവാണ് രേഖപ്പെടുത്തിയിരിക്കുന്നത്. ഈ സാഹചര്യത്തില്‍ മരണസംഖ്യ ഇനിയും ഉയരാന്‍ സാധ്യതയുണ്ടെന്നാണ് അധികൃതര്‍ വ്യക്തമാക്കുന്നത്.

ഇതുവരെ വീടുകളടക്കം 12,000ത്തോളം കെട്ടിടങ്ങളാണ് കാലിഫോര്‍ണിയയില്‍ പൂര്‍ണമായും കത്തിനശിച്ചിരിക്കുന്നത്. പാരഡൈസ് നഗരം പൂര്‍ണമായും വെന്തു വെണ്ണീറായി. 1,42,000 ഏക്കര്‍ വിസ്തൃതിയില്‍ കാട്ടുതീ പടര്‍ന്നുപിടിച്ചതായി അധികൃതര്‍ വ്യക്തമാക്കുന്നു. ഇന്നലെയോടെ 45 ശതമാനം തീ അണയ്ക്കാന്‍ സാധിച്ചതായും ഫയര്‍ഫോഴ്സ് അധികൃതരും വ്യക്തമാക്കി.