13കാരന് പീഡനം;പ്രമുഖ ഡോക്ടര്‍ക്കെതിരെ കേസ്

തിരുവനന്തപുരം: പതിമൂന്നുകാരനെ ലൈംഗികമായി പീഡിപ്പിക്കാന്‍ ശ്രമിച്ചെന്ന പരാതിയില്‍ തിരുവനന്തപുരം മെഡിക്കല്‍ കോളേജിലെ സൈക്കോളജി വിഭാഗം അസിസ്റ്റന്റ് പ്രൊഫസറും പ്രശസ്ത കൗണ്‍സിലറുമായ ഡോ.കെ.ഗിരീഷിനെതിരെ കേസെടുത്തു. പഠനവൈകല്യമുണ്ടെന്ന സംശയത്തില്‍ ഡോക്ടറുടെ സ്വകാര്യ ക്ലിനിക്കിലെത്തിയ കുട്ടിയ്ക്കാണ് ദുരനുഭവമുണ്ടായത്. സംഭവം നടന്ന് എട്ടുദിവസമായിട്ടും തുടര്‍ നടപടിയുണ്ടായില്ലെന്നാരോപിച്ച്‌ രക്ഷിതാക്കള്‍ മുഖ്യമന്ത്രി, ഡി.ജി.പി, കമ്മീഷണര്‍ എന്നിവര്‍ക്ക് പരാതി നല്‍കി.

പഠനവൈകല്യമുണ്ടെന്ന സംശയത്തില്‍ സ്കൂളിലെ കൗണ്‍സിലറുടെ നിര്‍ദ്ദേശപ്രകാരം ആഗസ്ത് 14നാണ് ഡോക്ടറുടെ ക്ലിനിക്കിലെത്തിയതെന്നാണ് മാതാവ് സിറ്റി പോലീസ് കമ്മീഷണർക്ക് നൽകിയ പരാതിയിൽ പറയുന്നത്. പ്രശസ്തനായ ഡോക്ടറാണെന്ന് അറിഞ്ഞപ്പോള്‍ കൂടുതല്‍ സമാധാനം തോന്നിയിരുന്നു. വൈകുന്നേരം 6.45ന് ആദ്യം മാതാപിതാക്കളോട് സംസാരിച്ച ശേഷമാണ് കുട്ടിയെ ഒറ്റയ്ക്ക് അകത്തുവിളിച്ചത്. 20 മിനിട്ടുകള്‍ക്ക് ശേഷം പുറത്തിറങ്ങിയ മകനില്‍ കയറിപ്പോയപ്പോഴുള്ള പ്രസന്നത കണ്ടില്ല. തുടര്‍ന്ന് സംസാരിച്ചപ്പോഴാണ് കുട്ടി കരഞ്ഞുകൊണ്ട് അനുഭവം പറഞ്ഞത്.
ബോക്സ് പോലുള്ള പസില്‍ കൊടുത്ത ശേഷം ഡോക്ടര്‍ പല പ്രാവശ്യം ഉമ്മ വയ്ക്കുകയും രഹസ്യഭാഗങ്ങളില്‍ സ്പര്‍ശിച്ചുകൊണ്ടിരിക്കുകയും ചെയ്തെന്ന് മകന്‍ പറഞ്ഞു. ഈ വിവരം അറിഞ്ഞുടന്‍ ചൈല്‍ഡ് ലൈന്‍ ഹെല്‍പ്പ്ലൈനില്‍ ബന്ധപ്പെടുകയും വിവരം അറിയിക്കുകയും ചെയ്തെന്ന് അമ്മയുടെ വാക്കുകൾ. തൊട്ടടുത്ത ദിവസം ചൈല്‍ഡ്ലൈന്‍ വിവരം തമ്ബാനൂര്‍ പോലീസിന് കൈമാറി. സംഭവം നടന്നത് ഫോര്‍ട്ട് പോലീസ് പരിധിയിലായതിനാല്‍ 16ന് കേസ് അവിടേയ്ക്ക് മാറ്റുകയും ചെയ്തു.

പോക്സോ ആക്‌ട് 7,8 വകുപ്പുപ്രകാരമാണ് കേസെടുത്തതെങ്കിലും സര്‍ക്കാര്‍ ഡോക്ടര്‍ എന്ന നിലയില്‍ 9ആം വകുപ്പുകൂടി ചുമത്തണമെന്നും പരാതിയില്‍ ആവശ്യപ്പെടുന്നു. ചൈല്‍ഡ് വെല്‍ഫെയര്‍ കമ്മിറ്റിയുടെ സൈക്യാട്രിസ്റ്റിന്റെ സാന്നിദ്ധ്യത്തില്‍ മാത്രമേ കുട്ടിയുടെ മൊഴിയെടുക്കാനാകൂ എന്ന് ഫോര്‍ട്ട് പോലീസ് പ്രതികരിച്ചു. രഹസ്യമൊഴിയുള്‍പ്പെടെ രേഖപ്പെടുത്താനുള്ള നടപടിക്രമങ്ങള്‍ തുടരുകയാണെന്നും പോലീസ് പറഞ്ഞു. ദേശീയ ആരോഗ്യമിഷന്റെ മാനസികാരോഗ്യ പരിപാടിയുടെ മുന്‍ സംസ്ഥാന കോഡിനേറ്റര്‍ കൂടിയായ ഇദ്ദേഹം ചാനല്‍ പരിപാടികളില്‍ സ്ഥിരം സാന്നിദ്ധ്യവുമാണ്.

sexual abuse case

sexual abuse case against famous doctor