ദേശാഭിമാനി റിപ്പോര്‍ട്ടര്‍ ഷഫീഖ് അമരാവതി അന്തരിച്ചു

കൊച്ചി: ദേശാഭിമാനി കൊച്ചി ബ്യൂറോയിലെ സീനിയര്‍ റിപ്പോര്‍ട്ടര്‍ ഷഫീഖ് അമരാവതി(46) അന്തരിച്ചു. ഫോര്‍ട്ട്‌കൊച്ചി കല്‍വത്തി കടുവിങ്കല്‍ കെ എം ബദറുദീന്റെയും ബീവിയുടെയും മകനാണ്. ഹൃദയ സംബന്ധമായ അസുഖത്തിന് ദീര്‍ഘനാളായി ചികിത്സയിലായിരുന്നു. ഞായറാഴ്ച വൈകിട്ട് അസുഖം മൂര്‍ഛിച്ചതിനെത്തുടര്‍ന്ന് കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും രാത്രി എട്ടോടെ മരിച്ചു. ഭാര്യ: സുനിത. മക്കള്‍: സഫ്ദര്‍, സൈഗാള്‍. സഹോദരങ്ങള്‍: ഷാജി, ഷഹീര്‍. ഖബറടക്കം തിങ്കളാഴ്ച രാവിലെ 11ന് ഫോര്‍ട്ട്‌കൊച്ചി കല്‍വത്തി ജുമാ മസ്ജിദ് ഖബറിസ്ഥാനില്‍.

1999ല്‍ ദേശാഭിമാനിയില്‍ റിപ്പോര്‍ട്ടറായി തുടക്കം. തിരുവനന്തപുരം, കോഴിക്കോട്, കൊച്ചി ബ്യൂറോകളിലും ഡെസ്‌കിലും പ്രവര്‍ത്തിച്ചു. ഗായകനും കലാ, സാംസ്‌കാരിക പ്രവര്‍ത്തകനുമായിരുന്നു. 'മെഹബൂബ് മുതല്‍ മേദിനി വരെ, സംഗീത സംവിധായകന്‍ അര്‍ജുനന്‍ മാസ്റ്ററുടെ ജീവിതത്തെ ആസ്പദമാക്കി 'കസ്തൂരി മണക്കുന്നല്ലോ' എന്നീ പുസ്തകങ്ങള്‍ രചിച്ചു. വിവിധ ആനുകാലികങ്ങളില്‍ ലേഖനങ്ങള്‍ എഴുതി. സദ്‌വാര്‍ത്ത, മാധ്യമം, സിറ്റി കേബിള്‍ എന്നിവയുടെ പ്രാദേശിക ലേഖകനായി മാധ്യമ പ്രവര്‍ത്തനം തുടങ്ങി. എറണാകുളം സെന്റ് ആല്‍ബര്‍ട്‌സ് കോളേജ്, കാക്കനാട് കേരള പ്രസ് അക്കാദമി എന്നിവിടങ്ങളില്‍ വിദ്യാഭ്യാസം. മട്ടാഞ്ചേരി കരുവേലിപ്പടി മൈത്രി നഗറില്‍(എംഎന്‍ആര്‍എ-38) ആണ് ഇപ്പോള്‍ താമസം.