കേരള കോണ്‍ഗ്രസുകാരെല്ലാം ഉണ്ണാക്കന്‍മാരാണെന്ന് കരുതരുത്; ജോസ്.കെ.മാണിയോട് ഷോണ്‍ ജോര്‍ജ്

പാലാ: പാലാ ഉപതിരഞ്ഞെടുപ്പില്‍ യു.ഡി.എഫ്. നേരിട്ട കനത്ത തോല്‍വിക്ക് വിമര്‍ശനമേറ്റുവാങ്ങുന്നത് കേരള കോണ്‍ഗ്രസിലെ ജോസ് കെ.മാണി വിഭാഗമാണ്. മുല്ലപ്പള്ളി രാമചന്ദ്രന്‍, കെ.മുരളീധരന്‍ തുടങ്ങി പ്രമുഖ യു.ഡി.എഫ്. നേതാക്കളെല്ലാം പ്രത്യക്ഷമായും പരോക്ഷമായും ജോസ് കെ.മാണി വിഭാഗത്തെയാണ് തോല്‍വിയില്‍ കുറ്റപ്പെടുത്തുന്നത്.

പി.സി.ജോര്‍ജിന്‍റെ മകനും കേരള കോണ്‍ഗ്രസ് യുവജന വിഭാഗം മുന്‍ നേതാവുമായ ഷോണ്‍ ജോര്‍ജും ജോസ് കെ.മാണിക്കെതിരെ വിമര്‍ശനവുമായി രംഗത്തെത്തിയിരിക്കുകയാണ്. ഫേസ്ബുക്ക് കുറിപ്പിലൂടെയാണ് ഷോണ്‍ ജോസ് കെ.മാണിയെയും ഭാര്യ നിഷ ജോസ് കെ.മാണിയെയും വിമര്‍ശിച്ചത്.

മൂന്ന് മാസം മുമ്പ് 33,000 വോട്ടിന്‍റെ ഭൂരിപക്ഷമുണ്ടായിരുന്ന പാലാ മണ്ഡലത്തെ ഈ അവസ്ഥയിലെത്തിച്ചത് ജോസ് കെ.മാണിയുടെ നിലപാടുകളാണെന്ന് ഷോണ്‍ കുറ്റപ്പെടുത്തി. കേരള കോണ്‍ഗ്രസുകാരെല്ലാം ഉണ്ണക്കന്‍മാരാണെന്ന് കരുതരുതെന്നും ഇനിയെങ്കിലും നന്നാകാന്‍ നോക്കണമെന്നും ജോസ് കെ.മാണിയോട് ഷോണ്‍ പറയുന്നു.