കോളജ് വിദ്യാർഥികളെ അറസ്റ്റ് ചെയ്തുവെന്ന നിലപാടിൽ മലക്കം മറിഞ്ഞ് ശോഭാ സുരേന്ദ്രൻ

തിരുവനന്തപുരം: ശബരിമല അക്രമത്തിൽ നടപടിയെടുത്ത പോലീസിനെ വിമർശിച്ച ശോഭാ സുരേന്ദ്രന്റെ നിലപാടിൽ മലക്കം മറിച്ചിൽ. നിലക്കലിലും പമ്പയിലും ശബരിമലയിലും സംഘർഷത്തിന് ചുക്കാൻ പിടിച്ചവരെ പോലീസ് അറസ്റ്റ് ചെയ്ത നടപടിയെ അപലപിച്ച് സംസാരിക്കുന്നതിനിടെയാണ് ബിജെപി സംസ്ഥാന ജനറൽ സെക്രട്ടറി ശോഭാ സുരേന്ദ്രൻ പ്രസ്താവന മാറ്റി പറഞ്ഞത്.

കോളജിൽ പോയ വിദ്യാർഥികളെ പോലീസ് പിടിച്ചു കൊണ്ട് പോയി ജയിലിലാക്കിയെന്ന് ശോഭാ സുരേന്ദ്രൻ ആരോപിച്ചു. താൻ കൊട്ടാരക്കര സബ് ജയിലിൽ ഇവരെ സന്ദർശിച്ചുവെന്നും ശോഭാ സുരേന്ദ്രൻ വ്യക്തമാക്കി. കോളജിൽ പോയ വിദ്യാർഥികളെ വീട്ടിൽ വിടാമെന്ന് പറഞ്ഞ് പോലീസുകാർ ജീപ്പിൽ കയറ്റി ജയിലിൽ അടച്ചുവെന്നാണ് ശോഭ ആരോപിച്ചത്. ഒരു ഡസനോളം നിരപരാധികളെ ഇത്തരത്തിൽ ജയിലിൽ അടച്ചുവെന്നും അവർ പറഞ്ഞു. ഇന്നലെ രാത്രി ഏഷ്യാനെറ്റ് ന്യൂസ് ചാനലിൽ ചർച്ചക്കിടെയാണ് ശോഭാ സുരേന്ദ്രന്റെ വിശദീകരണം.

ശോഭയുടെ ആരോപണത്തെ എതിർത്ത് കൂടുതൽ ചോദ്യങ്ങൾ അവതാരകൻ ചോദിച്ചതോടെ അവർ മലക്കം മറിഞ്ഞു. നിലക്കൽ, ശബരിമല ഭാഗത്ത് കോളജുകൾ ഇല്ലല്ലോ, അവർ എവിടെ നിന്നുള്ളവരാണെന്നും ആരെയാണ് പോലീസ് പിടിച്ചതെന്നുമുള്ള അവതാരകന്റെ മറു ചോദ്യത്തിന് കൃത്യമായ ഉത്തരം നൽകാൻ ശോഭാ സുരേന്ദ്രന് കഴിഞ്ഞില്ല. നിലക്കലിൽ പ്രതിഷേധം സംഘടിപ്പിക്കാൻ എത്തിയ ബിജെപി സംസ്ഥാന നേതാക്കളെ സന്ദർശിക്കാൻ കോളജുകളിലുള്ള തങ്ങളുടെ പ്രവർത്തകർ എത്തിയതാണെന്ന മറുപടിയാണ് പിന്നീട് ശോഭ സുരേന്ദ്രൻ നൽകിയത്.

കോളജുകളിൽ പോയ വിദ്യാർഥികളെ പോലീസ് അറസ്റ്റ് ചെയ്തിട്ടുണ്ടെകിൽ അത് എൻഎസ്എസ് ആരോപിച്ചത് പോലെ അടിയന്തരാവസ്ഥക്ക് തുല്യമായ സാഹചര്യമല്ലേയെന്നും അവതാരകൻ ചോദിച്ചപ്പോൾ ശോഭ സുരേന്ദ്രന് കൃത്യമായ മറുപടി നൽകാൻ കഴിഞ്ഞില്ല.കൂടാതെ, കോളജിൽ നിന്നും മടങ്ങിയ വിദ്യാർഥികളെ പോലീസ് അറസ്റ്റ് ചെയ്തുവെന്ന് താൻ പറഞ്ഞിട്ടില്ലായെന്നും അവർ ചർച്ചക്കിടെ പറഞ്ഞു. ശബരിമല അക്രമത്തിൽ നുഴഞ്ഞുകയറ്റക്കാരുണ്ടോ?നാമജപം നടത്തിക്കൊണ്ടിരുന്ന വിശ്വാസികളോ, ബിജെപി-ആർഎസ്എസ് പ്രവർത്തകരോ അല്ല അവിടെ അക്രമം നടത്തിയതെന്ന ബിജെപി പ്രസ്താവച്ചിരുന്നു. പിന്നെ അക്രമികൾ അവിടെ നുഴഞ്ഞു കയറിയോ എന്ന ഏഷ്യാനെറ്റ് ന്യൂസ് അവതാരകന്റെ ചോദ്യത്തിനാണ് ശോഭാ സുരേന്ദ്രൻ ഇങ്ങനെ മറുപടി നൽകിയത്.