​ഗാനമേളയ്ക്കിടെ അരുംകൊല; സത്യനാഥനെ വെട്ടിയത് മഴുകൊണ്ട്; ഞെട്ടിത്തരിച്ച് നാട്

കോഴിക്കോട്: സിപിഎം ലോക്കൽ സെക്രട്ടറി വെട്ടേറ്റ് കൊല്ലപ്പെട്ട സംഭവത്തിൻ്റെ നടുക്കത്തിൽ നാട്. സിപിഎം കൊയിലാണ്ടി ടൗൺ സെൻട്രൽ ലോക്കൽ സെക്രട്ടറി പുളിയോറ വയലിൽ പിവി സത്യനാഥൻ (66) ആണ് ക്ഷേത്രത്തിൽ ഗാനമേള നടക്കുന്നതിനിടെ ക്ഷേത്രമുറ്റത്തുവെച്ച് ആക്രമിക്കപ്പെട്ടത്. വ്യാഴാഴ്ച രാത്രി 10 മണിയോടെ ഗാനമേള അവസാനിക്കുന്ന ഘട്ടത്തിലാണ് സംഭവം നടന്നതെന്ന് പെരുവട്ടൂ‍ർ ചെറിയപ്പുറം ക്ഷേത്രം ഭാരവാഹികൾ പറഞ്ഞു.ശബ്ദം കേട്ട് ഓടിയെത്തിയപ്പോഴാണ് വെട്ടേറ്റ നിലയിൽ സത്യേട്ടനെ കാണുന്നത്. ഉടൻതന്നെ കൊയിലാണ്ടിയിലെ ആശുപത്രിയിൽ എത്തിക്കാനുള്ള ശ്രമം നടന്നു. എന്താ സംഭവിച്ചതെന്ന് ആദ്യം മനസ്സിലായില്ല. സംഭവം നടന്ന സ്ഥലം സിസിടിവിയുടെ പരിധിയിൽനിന്ന് അൽപം മാറി ആയതിനാൽ വ്യക്തമായ ദൃശ്യം പതിഞ്ഞിട്ടില്ല. എന്നാൽ വീഴുന്ന ദൃശ്യം സിസിടിവിയിലുണ്ട്. സംഭവം നടന്നതിനു പിന്നാലെ സിസിടിവിയുടെ ഹാ‍ർഡ് ഡിസ്കുള്ള മുറി പൂട്ടിയെന്നും പോലീസ് എത്തിയ ശേഷം അവ കൈമാറിയെന്നും ക്ഷേത്രം ഭാരവാഹികൾ പറഞ്ഞു.


"സത്യേട്ടൻ നമ്മടെ ബന്ധുവും ഏറ്റവും വേണ്ടപ്പെട്ട ആളുമാണ്. ആ കുടുംബം തന്നെ നമ്മളുമായി വളരെ സഹകരിച്ചു വരുന്നവരാണ്. മകന് ക്ഷേത്ര കമ്മിറ്റിയുമായി ബന്ധമുണ്ട്. സംഭവം വളരെ വലിയ ഷോക്കാണ്. സൗമ്യസ്വഭാവക്കാരനായ അദ്ദേഹത്തിന് ശത്രുക്കൾ ഉള്ളതായി അറിയില്ല. എന്താണ് സംഭവിച്ചതെന്ന് അറിയില്ല. പ്രതിയെന്ന് പറയുന്ന ആൾ സമീപവാസിതന്നെയാണ്"- ക്ഷേത്രം ഭാരവാഹികൾ പറഞ്ഞു.
കൊയിലാണ്ടിയിൽ സിപിഎം ലോക്കൽ സെക്രട്ടറിയെ വെട്ടിക്കൊന്നു; ഇന്ന് പ്രാദേശിക ഹർത്താൽ

അതേസമയം സംഭവത്തിൽ പ്രതിയായ പെരുവട്ടൂ‍ർ പുറത്താന സ്വദേശി അഭിലാഷ് (33) പോലീസ് സ്റ്റേഷനിലെത്തി കീഴടങ്ങി. സത്യനാഥൻ്റെ പുറത്തും കഴുത്തിലുമാണ് വെട്ടേറ്റതെന്ന് പോലീസ് പറഞ്ഞു. മഴുകൊണ്ടാണ് ആക്രമണം നടത്തിയത്. സംഭവസമയം സത്യനാഥൻ്റെ ഭാര്യയും മക്കളും ഉത്സവപ്പറമ്പിലുണ്ടായിരുന്നു.

സത്യനാഥൻ്റെ മരണത്തിൽ പ്രതിഷേധിച്ചു സിപിഎം അരിക്കുളം, കീഴരിയൂർ, കൊയിലാണ്ടി, ചെങ്ങോട്ടുകാവ്, ചേമഞ്ചേരി എന്നിവിടങ്ങളിൽ ഹർത്താലിന് ആഹ്വാനം ചെയ്തു. സത്യനാഥൻ്റെ മൃതദേഹം കോഴിക്കോട് മെഡിക്കൽ കോളേജിൽ സൂക്ഷിച്ചിരിക്കുകയാണ്. പോസ്റ്റ് മോ‍ർട്ടത്തിനുശേഷം കുടുംബത്തിന് വിട്ടുനൽകും.