പി.കെ ശശി നയിക്കുന്ന കാല്‍നട ജാഥ തുടങ്ങി

പാലക്കാട്: പി.കെ.ശശി എംഎല്‍എ നയിക്കുന്ന സിപിഐഎം ഷൊര്‍ണൂര്‍ നിയോജകമണ്ഡലം കാല്‍നട ജാഥയ്ക്ക് തുടങ്ങി. ശബരിമല വിഷയത്തിലുള്ള നിലപാട് വിശദീകരിക്കാനായാണ് പാര്‍ട്ടി ജാഥ നടത്തുന്നത്. ഡിവൈഎഫ്‌ഐ വനിതാ നേതാവിന്റെ പരാതിയില്‍ അന്വേഷണം നേരിടുന്ന പി.കെ.ശശി ജാഥ നയിക്കുന്നതിനെതിരെ പാര്‍ട്ടിയുടെ ഉള്ളിൽ തന്നെ എതിര്‍പ്പ് ഉയര്‍ന്നിരിക്കുകയാണ്.

ഷൊര്‍ണൂരിലെ ജാഥ മറ്റേതെങ്കിലും നേതാവ് നയിക്കണമെന്നാണു പാര്‍ട്ടിയിലെ ഒരു വിഭാഗം ആവശ്യപ്പെട്ടിരിക്കുന്നത്. പക്ഷേ ശശിക്കായി ജില്ലാ നേതൃത്വം ശക്തമായി വാദിച്ചതോടെയാണ് ജാഥ അദ്ദേഹം തന്നെ നയിച്ചത്. കഴിഞ്ഞദിവസം തിരുവാഴിയോട്ടു നടന്ന സമ്മേളനത്തില്‍ എല്‍ഡിഎഫ് കണ്‍വീനര്‍ എ. വിജയരാഘവനാണ് ശശിക്ക് പതാക കൈമാറിക്കൊണ്ട് ജാഥ ഉദ്ഘാടനം ചെയ്തത്.

വ്യാഴാഴ്ച മണ്ഡലത്തിൽ പര്യടനം ആരംഭിച്ചിരിക്കുന്ന ജാഥാസമാപനം 25നാണ്. പാര്‍ട്ടിയിലെ യുവജനസംഘടനകളെല്ലാം ശശിക്കെതിരെ നിലകൊണ്ടിരിക്കുന്ന പശ്ചാത്തലത്തിൽ ജാഥക്യാപ്റ്റനായി ശശി വന്നിരിക്കുന്നതിനെതിരെ മുറുമുറുപ്പ് ഏറെയാണ്.