മുഖ്യമന്ത്രി വിമര്‍ശിച്ചത് നിയമം അറിയാതെ: മനുഷ്യാവകാശക്കമ്മീഷന്‍

തിരുവനന്തപുരം: ശ്രീജിത്തിന്റെ കസ്റ്റഡിമരണത്തില്‍ ഇടപെടാന്‍ മനുഷ്യാവകാശക്കമ്മീഷന് അവകാശമുണ്ടെന്ന് കമ്മീഷന്‍ ആക്ടിങ് ചെയര്‍മാന്‍ പി.മോഹന്‍ദാസ്. മുഖ്യമന്ത്രി നിയമം അറിയാതെയാകും കമ്മീഷനെ വിമര്‍ശിച്ചതെന്നും അദ്ദേഹം പറഞ്ഞു.

രാഷ്ട്രീയത്തെക്കാള്‍ നല്ലത് ജുഡീഷ്യറി ആണെന്ന് മനസ്സിലാക്കി രാഷ്ട്രീയം ഉപേക്ഷിച്ച് വന്നയാളാണ് താന്‍ ഒരു രാഷ്ട്രീയകക്ഷിയോടും തനിക്ക് മമതയില്ലെന്നും അദ്ദേഹം പറഞ്ഞു.
എജിയോട് ചോദിച്ചാല്‍ കമ്മീഷന്റെ അധികാരം മുഖ്യമന്ത്രിക്ക് മനസ്സിലാകുമായിരുന്നെന്ന് മോഹന്‍ദാസ് അഭിപ്രായപ്പെട്ടു. വരാപ്പുഴ കസ്റ്റഡിമരണത്തില്‍ മനുഷ്യാവകാശലംഘനം നടന്നിട്ടുണ്ട്. ശ്രീജിത്തിന്റെ മരണത്തിന്റെ ഉത്തരവാദിത്തം പോലീസിനാണ്.

പോലീസിനെതിരെ നിരന്തരം മനുഷ്യാവകാശക്കമ്മീഷന് പരാതി കിട്ടാറുണ്ട്. ഉദ്യോഗസ്ഥനെ സ്ഥലം മാറ്റാനുള്ള സര്‍ക്കാരിന്റെ അവകാശത്തില്‍ കടന്നുകയറിയിട്ടില്ല. ആരോപണവിധേയനായ ഒരാളെയാണ് പോലീസിന് പരിശീലനം നല്‍കാന്‍ നിയോഗിച്ചത്.
ഇതിലെ പൊരുത്തക്കേട് ചൂണ്ടിക്കാണിക്കുക മാത്രമാണ് ചെയ്തതെന്നും മോഹന്‍ദാസ് പറഞ്ഞു.

മനുഷ്യാവകാശക്കമ്മീഷന്‍ കമ്മീഷന്റെ പണിയെടുത്താല്‍ മതിയെന്ന് മുഖ്യമന്ത്രി പിണറായി വിജയന്‍ കഴിഞ്ഞ ദിവസം വിമര്‍ശിച്ചിരുന്നു.