ഷുഹൈബ് വധം: പിടിയിലായത് 'ഡമ്മി പ്രതികളെന്ന് കെ സുധാകരന്‍

കണ്ണൂർ: കസ്റ്റഡിയില്‍ ഉളളവര്‍ ഡമ്മി പ്രതികളാണെന്ന് കോണ്‍ഗ്രസ് നേതാവ് കെ സുധാകരന്‍. മട്ടന്നൂരിൽ യൂത്ത് കോൺഗ്രസ് ബ്ളോക്ക് സെക്രട്ടറി ഷുഹൈബിനെ വധിച്ച കേസിൽ പോലീസ് കസ്റ്റഡിയിലുള്ളവരെ പറ്റിയാണ് സുധാകരന്‍റെ ഈ പരാമർശം. യഥാര്‍ത്ഥ പ്രതികളെ രക്ഷപ്പെടുത്താനായി സിപിഎം പ്രാദേശിക നേതൃത്വം തയ്യാറാക്കിയ തിരക്കഥയാണിതെന്നും സുധാകരന്‍ പറഞ്ഞു.

കേസില്‍ രണ്ടു പേരെ കൂടി പൊലീസ് കസ്റ്റഡിയിലെടുത്തിട്ടുണ്ട്. സി.പി.എം പ്രവർത്തകരായ തില്ലങ്കേരി സ്വദേശികളായ ആകാശ്, റിജിൻ രാജ് എന്നിവരാണ് കസ്റ്റഡിയിലുള്ളത്. ആർ.എസ്.എസ് പ്രവർത്തകനെ കൊന്ന കേസിലെ പ്രതികളാണിവർ. കേസുമായി ബന്ധപ്പെട്ട് ഇന്നലെ ആറുപേരെ കസ്റ്റഡിയിൽ എടുത്തിരുന്നു.