സര്‍ക്കാര്‍ ജീവനക്കാരില്‍ നിന്ന് ആറ് ദിവസത്തെ ശമ്പളം അഞ്ച് മാസം പിടിയ്ക്കുമെന്ന് നിര്‍ദേശം

തിരുവനന്തപുരം: സര്‍ക്കാര്‍ ജീവനക്കാരില്‍ നിന്ന് ആറ് ദിവസത്തെ ശമ്പളം പിടിയ്ക്കാന്‍ മന്ത്രിസഭാ യോഗത്തില്‍ നിര്‍ദേശം. ഒരു മാസത്തെ ശമ്പളം സാലറി ചലഞ്ചായി നല്‍കുന്നതിന് പകരമായി ധനമന്ത്രി തോമസ് ഐസക് ആണ് ഈ നിര്‍ദേശം മുന്നോട്ട് വച്ചത്.

Also Read: LIVE: കൊവിഡ് ബാധിച്ച് മലയാളി അബുദാബിയിൽ മരിച്ചു

പ്രളയകാലത്ത് നടപ്പാക്കിയ സാലറി ചലഞ്ച് മാതൃക ഫലപ്രദമാകില്ലെന്ന വിലയിരുത്തലിനെ തുടര്‍ന്നാണ് പുതിയ നിര്‍ദേശം. ഓരോ മാസത്തെയും ആറ് ദിവസത്തെ ശമ്പളം വീതം അഞ്ച് മാസമായാണ് പിടിയ്ക്കുക. ശമ്പളം പിടിയ്ക്കുന്നതില്‍ നിന്ന് ഒരു ജീവനക്കാരനും ഇളവുകളുണ്ടാകില്ല.

ആറ് ദിവസത്തെ ശമ്പളം അഞ്ച് മാസമായി പിടിയ്ക്കുമ്പോള്‍ ഒരു മാസത്തെ ശമ്പളത്തിന് തുല്യമായ തുക സര്‍ക്കാരിന് ലഭിക്കും. ഇത് കൊവിഡ് പ്രതിരോധത്തിന് ഉപയോഗിക്കാനാണ് തീരുമാനിച്ചിരിക്കുന്നത്.

Also Read: 24 മണിക്കൂറിനിടെ 50 മരണം, രാജ്യത്ത് കൊവിഡ് ബാധിതരുടെ എണ്ണം 20,000 ത്തിലേക്ക്, ആശങ്ക ഉയരുന്നു

ഇത്തരത്തില്‍ ശമ്പളം പിടിയ്ക്കുന്നതിലൂടെ ജീവനക്കാര്‍ക്ക് അധിക ഭാരമാകില്ലെന്നാണ് സര്‍ക്കാരിന്റെ വിലയിരുത്തല്‍. സാമ്പത്തിക സ്ഥിതി മെച്ചപ്പെട്ടാല്‍ പിടിയ്ക്കുന്ന ശമ്പളം പിന്നീട് ജീവനക്കാര്‍ക്ക് മടക്കി നല്‍കാമെന്നാണ് നിര്‍ദേശം.