ശമ്പളം ചോദിച്ച പതിനാറുകാരിയെ കൊന്ന് വെട്ടിനുറുക്കി

ന്യൂഡൽഹി: ശമ്പളം ചോദിച്ചതിന് വീട്ടുജോലിക്കാരിയായ പതിനാറുവയസുകാരിയെ കൊലപ്പെടുത്തി മൂന്നു കഷണങ്ങളാക്കി ഓടയിൽ ഉപേക്ഷിച്ചു. ജാര്‍ഖണ്ഡ്കാരിയായ പെൺകുട്ടിയുടെ കൊലപാതകത്തിൽ ഒരാള്‍ അറസ്റ്റിലായി.

പെൺകുട്ടിയെ ജോലിയ്ക്കെത്തിച്ച ഇടനിലക്കാരൻ മൻജീത് കര്‍കേറ്റയാണ് അറസ്റ്റിലായത്. താനാണ് കൊലനടത്തിയതെന്ന് സമ്മതിച്ച പ്രതി ഒരു സ്ത്രീയുടെയും മറ്റൊരാളുടെയും സഹായം ലഭിച്ചെന്നും പോലീസിനോട് സമ്മതിച്ചു.

ഡൽഹിയിലെ മിയാൻവാലി നഗറിൽ നിന്നാണ് പെൺകുട്ടിയുടെ മൃതദേഹം കണ്ടെത്തിയത്. പ്രദേശത്തെ സിസിടിവി ക്യാമറകള്‍ പോലീസ് പരിശോധിച്ചിരുന്നു. പെൺകുട്ടിയെ കാണാനില്ലന്ന് വ്യക്തമായതോടെ കര്‍കേറ്റയുടെ ഗ്രാമത്തിൽ റെയ്ഡ് നടത്തിയെങ്കിലു ഇയാളെ കണ്ടെത്തിയില്ല. തുടര്‍ന്ന് 17വന് ഡൽഹിയിലെ വാടകവീട്ടിൽ നിന്ന് ഇയാള പിടികൂടുകയായിരുന്നു.

ജാര്‍ഖണ്ഡിൽ നിന്ന് പാവപ്പെട്ട പെൺകുട്ടികളെ മികച്ച ജോലി വാഗ്ദാനം ചെയ്ത് ഡൽഹിയിലെത്തിക്കുന്നവരാണ് പ്രതികള്‍ മൂന്നുപേരും. ഇവരുടെ ശമ്പളം പ്രതികളാണ് കൈപ്പറ്റുന്നതും. തുടര്‍ന്ന് ജോലി ഉപേക്ഷിച്ച പെൺകുട്ടി മെയ് മൂന്നിന് കര്‍കേറ്റയുടെ അടുത്തെത്തി പണം ആവശ്യപ്പെടുകയായിരുന്നു. ഇതിൽ പ്രകോപിതനായാണ് ഇയാള്‍ പെൺകുട്ടിയെ കൊന്നത്.