കേരളത്തിൽ കാലവർഷം മെയ് 28ന് തുടങ്ങുമെന്ന് പ്രവചനം

കൊച്ചി: സംസ്ഥാനത്ത് കാലവര്‍ഷം ജൂൺ ഒന്നിനു മുൻപേ ആരംഭിച്ചേക്കുമെന്ന് പ്രവചനം. മെയ്28നു തന്നെ തെക്കുപടിഞ്ഞാറൻ കാലവര്‍ഷം ആരംഭിക്കുമെന്നാണ് സ്വകാര്യ കാലാവസ്ഥാ നിരീക്ഷണ ഏജൻസിയായ സ്കൈമെറ്റിൻ്റെ പ്രവചനം. സാധാരണഗതിയില്‍ ജൂൺ ഒന്നാം തീയതിയോടു കൂടിയാണ് കേരളത്തിൽ കാലവര്‍ഷം ആരംഭിക്കുന്നത്. അതേസമയം, പ്രവചിക്കപ്പെട്ട തീയതിയില്‍ നിന്ന് മുന്നോട്ടോ പിന്നോട്ടോ നാലു ദിവസം മാറാമെന്നും സ്കൈമെറ്റ് വ്യക്തമാക്കിയിട്ടുണ്ട്.

കേരളത്തില്‍ കാലവര്‍ഷം രണ്ട് ദിവസം വരെ നേരത്തെയാകാമെങ്കിലും രാജ്യത്തെ മറ്റു കേന്ദ്രങ്ങളില്‍ ഇതിൻ്റെ സ്വാധീനമുണ്ടാകാനിടയില്ലെന്നാണ് സ്കൈമെറ്റിൻ്റെ റിപ്പോര്‍ട്ട്. കേരളത്തില്‍ മെയ് 31ന് കാലവര്‍ഷം ആരംഭിച്ചേക്കുമെന്ന് മറ്റൊരു സ്വകാര്യ ഏജൻസിയായ ദ വെതര്‍ കമ്പനി മുൻപ് പ്രവചിച്ചിരുന്നു.

Also Read: COVID-19: കേരളത്തെ തള്ളി കേന്ദ്രം; പ്രവാസികൾ 14 ദിവസം സര്‍ക്കാര്‍ ക്വാറന്റീനിൽ തന്നെ കഴിയണം

അതേസമയം, സംസ്ഥാനത്ത് കാലവര്‍ഷം എന്നു തുടങ്ങുമെന്നത് സംബന്ധിച്ച് കാലാവസ്ഥാ വകുപ്പ് പ്രവചനം പുറത്തു വിട്ടിട്ടില്ല. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദം മൂലമാണ് സംസ്ഥാനത്ത് ഇത്തവണ നേരത്തെ കാലവര്‍ഷം തുടങ്ങുന്നതെന്നാണ് സ്കൈമെറ്റ് വ്യക്തമാക്കുന്നത്. മെയ് 22ഓടു കൂടി മാത്രമായിരിക്കും ആൻഡമാൻ നിക്കോബാര്‍ ദ്വീപുകളില്‍ കാലവര്‍ഷം ആരംഭിക്കുക.

Also Read: ജലനിരപ്പ് 2019നും മുകളിൽ; കൊവിഡിനിടെ പ്രളയവും വന്നാൽ? മുന്നറിയിപ്പുമായി വിദഗ്ധർ

മെയ് 25 മുതല്‍ ജൂൺ എട്ട് വരെയുള്ള ദിവസങ്ങളിലാണ് കഴിഞ്ഞ പത്തു വര്‍ഷത്തിനിടെ സംസ്ഥാനത്ത് തെക്കുപടിഞ്ഞാറൻ മൺസൂൺ ആരംഭിച്ചിട്ടുള്ളത്. എന്നാല്‍ 2009ല്‍ മെയ് 23നു തന്നെ കേരളത്തിൽ മഴക്കാലം തുടങ്ങിയിരുന്നു. 2016, 2019 എന്നീ വര്‍ഷങ്ങളില്‍ ജൂൺ എട്ടിനു മാത്രമാണ് കാലവര്‍ഷം തുടങ്ങിയത്.