കൊച്ചിയില്‍ നാലു വയസുകാരിക്ക് ഉറക്കം അഞ്ച് ദിവസത്തോളം!!

വിദേശരാജ്യങ്ങളിൽ മാത്രം റിപ്പോർട്ട് ചെയ്തിരുന്ന സ്ലീപ്പിങ് ബ്യൂട്ടി സിൻഡ്രോം ഇതാദ്യമായി കൊച്ചിയിലെ ഒരു ബാലികയ്ക്ക്. ലിയ എന്ന നാലുവയസ്സുക്കാരിക്കാണ് അപൂർവ്വമായി കാണാറുള്ള ഉറക്കവൈകല്യമുള്ളത്. കൊച്ചിയിലെ ആസ്റ്റർ മെഡിസിറ്റിയിലെ ഡോക്ടർമാരാണ് കുട്ടിക്ക് സ്ലീപ്പിങ് ബ്യൂട്ടി സിൻഡ്രോം ഉള്ളതായി സ്ഥിരീകരിച്ചത്.

കാലടി സ്വദേശികളായ ഡെന്നിക്കും ലിനുവിനും ആറുവർഷത്തിനുശേഷമുണ്ടായ മകളാണ് ലിയ. മൂന്നുവയസിലാണ് കുട്ടി ആദ്യമായി സംസാരിക്കാൻ തുടങ്ങിയത്. അപ്പോൾ തന്നെ കുട്ടിക്ക് വൈകല്യമുള്ളതായി തോന്നിയിരുന്നു. കഴിഞ്ഞ ഓക്ടോബറിൽ ലിയ പെട്ടെന്ന് അബോധാവസ്ഥയിലായി. ചുഴലിയാണെന്ന് കരുതിയായിരുന്നു ആദ്യം ചികിത്സകൾ നടത്തിയത്. എന്നാൽ തുടർച്ചയായി അബോധാവസ്ഥയുണ്ടായപ്പോൾ മാതാപിതാക്കൾ കുട്ടിയെ ആസ്റ്റര്‍ മെഡിസിറ്റിയില്‍ വിദഗ്ദ്ധ ചികിത്സയ്ക്ക് കൊണ്ടുവന്നു.

ഹൃദയമിടിപ്പും ശ്വാസോച്ഛ്വാസവും കുറഞ്ഞ നിലയിലായിരുന്നു കുട്ടിയെ പ്രവേശിപ്പിച്ചത്. അഞ്ച് ദിവസത്തോളം ലിയ ചികിത്സയോട് യാതൊരു വിധത്തിലും പ്രതികരിക്കാതെ മയക്കമായിരുന്നു. ഇവിടെ നടത്തിയ വിദഗ്ദ്ധ പരിശോധനയ്ക്ക് ഒടുവിലാണ് സ്ലീപ്പിങ് ബ്യൂട്ടി സിന്‍ഡ്രോം ആണെന്ന് സ്ഥിരീകരിച്ചത്. ഈ രോഗാവസ്ഥ കാരണമാണ് കുട്ടി അഞ്ച് ദിവസത്തോളം യാതൊരു പ്രതികരണവുമില്ലാതെ ഉറങ്ങിയത്.

ഇതുവരെ ഈ രോഗമുണ്ടെന്ന് കണ്ടെത്തിയവരിൽ മൂന്നിൽ രണ്ടും പുരുഷന്മാരാണ്. പത്തുലക്ഷത്തില്‍ ഒന്നോ രണ്ടോ പേർക്കാണ് ഈ രോഗമുള്ളതായി സ്ഥിരീകരിച്ചിട്ടുള്ളത്. ഉറക്കവൈകല്യം കണ്ടെത്തിയ ലോകത്തിൽ വച്ച് ഏറ്റവും പ്രായം കുറഞ്ഞ കുട്ടിണിപ്പോൾ ലിയ. കുട്ടിയിപ്പോൾ മരുന്നും ഭക്ഷണവും കഴിക്കുന്നുണ്ടെന്നും ഉണർന്നിരിക്കുകയാണെന്നും ഡോക്ടരമാർ അറിയിച്ചു.

Sleeping beauty syndrome reported in kochi

Lia, a four year old girl, has been diagonised as Sleeping beauty syndrome from auster medicity, kochi.