കൊല്ലം എസ്എൻ കോളജ് വിദ്യാർഥിക്ക് വെട്ടേറ്റു

കൊല്ലം: എസ്എൻ കോളജ് വിദ്യാർഥിക്ക് വെട്ടേറ്റു. രണ്ടാം വർഷ ബിഎ ചരിത്ര വിദ്യാർഥി സച്ചിനാണ് വെട്ടേറ്റത്. കോളജിന് പുറത്തുള്ളവരാണ് സച്ചിനെ വെട്ടിയത്.

അതിനിടെ, രണ്ടര മാസം മുൻപ് എറണാകുളം മഹാരാജാസ് കോളജിൽ അഭിമന്യുവിനെ വെട്ടിക്കൊലപ്പെടുത്തിയ കേസിലെ എട്ട് പ്രതികൾക്കായി പോലീസ് ലുക് ഔട്ട് നോട്ടീസ് പുറപ്പെടുവിച്ചു. 18 പ്രതികൾ ഇതിനോടകം പോലീസ് പിടിയിലായിട്ടുണ്ട്. എസ്എഫ്ഐ നേതാവായിരുന്ന അഭിമന്യുവിനെ കൊലപ്പെടുത്തിയ സംഭവത്തിൽ മുഖ്യ ആസൂത്രകനെന്ന് കരുതുന്ന ആരിഫ് ബിൻ സലിം അടക്കമുള്ള എട്ട് പേർക്കെതിരെയാണ് നോട്ടീസ് പുറത്തിറക്കിയിരിക്കുന്നത്.

കൊച്ചി പള്ളുരുത്തി സ്വദേശികളായ മുഹമ്മദ് ഷഹിം, ജിസാല്‍ റസാഖ്, ആലുവ സ്വദേശികളായ ഫായിസ് പി.എം, ആരിഫ് ബിന്‍ സലീം, കച്ചേരിപ്പടി സ്വദേശി ഷിഫാസ്, മരട് സ്വദേശികളായ സഹല്‍, തന്‍സില്‍, സനിദ് എന്നവർക്കായാണ് ലുക്ക് ഔട്ട് നോട്ടീസ് പുറപ്പെടുവിച്ചിരിക്കുന്നത്.

പ്രതികളെ കുറിച്ചുള്ള വിവരങ്ങള്‍ അസി. കമ്മീഷണര്‍ എസ്.ടി സുരേഷ് കുമാര്‍ (ഫോണ്‍ - 9497990066), അസി. കമ്മീഷണര്‍ കെ ലാല്‍ജി ( ഫോണ്‍ - 9497990069), പോലീസ് ഇൻസ്‌പെക്ടർ എ.അനന്തലാൽ( ഫോണ്‍ - 9497987103) എന്നിവരെ അറിയിക്കണമെന്ന് പോലീസ് അറിയിച്ചു. ഇത് വരെ പിടിയിലായ എല്ലാവരും ക്യാമ്പസ് ഫ്രണ്ട്, എസ്‌ഡിപിഐ, പോപ്പുലർ ഫ്രണ്ട് പ്രവർത്തകരാണ്.