കെഎസ്ആര്‍ടിസിയെ ചിലര്‍ ഞെക്കിക്കൊല്ലാൻ ശ്രമിക്കുന്നുവെന്ന് മന്ത്രി ശശീന്ദ്രൻ

കോഴിക്കോട്: മൂന്ന് മേഖലകളായി തിരിക്കുന്നത് കെഎസ്ആര്‍ടിസിയുടെ പ്രവര്‍ത്തനം കാര്യക്ഷമമാക്കുമെന്ന് ഗതാഗതമന്ത്രി എ കെ ശശീന്ദ്രൻ. പലരും കെഎസ്ആര്‍ടിസിയെ ഞെക്കിക്കൊല്ലാൻ നോക്കുകയാണ്. മേഖലാതരംതിരിവിനെ എതിര്‍ക്കുന്നത് നിക്ഷിപ്തതാത്പര്യക്കാരാണെന്നും അവരുടെ ദുര്‍വ്യാഖ്യാനത്തെ ജനങ്ങള്‍ തിരിച്ചറിയുമെന്നും മന്ത്രി പറഞ്ഞു. കെഎസ്ആര്‍ടിസി ഉത്തരമേഖലാ വിഭാഗം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

ഓണക്കാലത്ത് അന്യസംസ്ഥാനബസുകളുടെയും സ്വകാര്യബസുകളുടെയും ചൂഷണം തടയാൻ കെഎസ്ആര്‍ടിസി ആരംഭിക്കുന്ന മാവേലി ബസ് പദ്ധതിയുടെ മുന്നൊരുക്കങ്ങള്‍ അവസാനഘട്ടത്തിലാണ്. സര്‍വീസിന് സജ്ജമായ 25 ബസുകള്‍ക്ക് താത്കാലിക പെര്‍മിറ്റ് അനുവദിച്ചിട്ടുണ്ട്.

നഗരങ്ങളെ തമ്മിൽ എസി ലോഫ്ളോര്‍ ബസുകള്‍ ഉപയോഗിച്ച് ബന്ധിപ്പിക്കുന്ന ചിൽ ബസ് പദ്ധതി ലാഭകരമാണെന്ന് മന്ത്രി അഭിപ്രായപ്പെട്ടു. കോഴിക്കോട് - പാലക്കാട്, കോഴിക്കോട് - കോയമ്പത്തൂര്‍ റൂട്ടിലും ചിൽ ബസ് സര്‍വീസ് ആരംഭിക്കുമെന്ന് മന്ത്രി പറഞ്ഞു.