കെഎം ഷാജിക്ക് നിയമസഭയില്‍ എത്താനാകില്ലെന്ന് സ്പീക്കര്‍

തിരുവനന്തപുരം: എംഎല്‍എ സ്ഥാനത്ത് നിന്ന് അയോഗ്യനാക്കപ്പെട്ട കെഎം ഷാജിക്ക് നിയമസഭയില്‍ എത്താനാകില്ലെന്ന് സ്പീക്കര്‍ പി ശ്രീരാമകൃഷ്ണന്‍. സുപ്രീം കോടതിയുടെ വാക്കാല്‍ പരാമര്‍ശം ഉത്തരവായി കണക്കാക്കാനാകില്ല. രേഖാമൂലം അറിയിപ്പ് ലഭിക്കാതെ നിയമസഭാ യോഗങ്ങളിലടക്കം ഷാജിക്ക് പങ്കെടുക്കാനാകില്ലെന്നും ഇക്കാര്യം ഷാജിയെ അറിയിക്കുമെന്നും സ്പീക്കര്‍ വ്യക്തമാക്കി.

കെഎം ഷാജിക്ക് നിയമസഭാ നടപടികളില്‍ പങ്കെടുക്കാന്‍ സുപ്രീം കോടതിവാക്കാല്‍ അനുമതി നല്‍കിയിരുന്നു. അതേസമയം യോഗങ്ങളില്‍ പങ്കെടുക്കാമെന്നല്ലാതെ യാതൊരു ആനുകൂല്ല്യവും കൈപ്പറ്റാനാകില്ലെന്നും സുപ്രീം കോടതി വ്യക്തമാക്കിയിരുന്നു. ഹൈക്കോടതി വിധിക്കെതിരെ കെഎം ഷാജി നല്‍കിയ ഹര്‍ജിയിലായിരുന്നു സുപ്രീം കോടതിയുടെ പരാമര്‍ശം.

ഹൈക്കോടതി വിധി ചോദ്യം ചെയ്ത് സമര്‍പ്പിച്ച ഹര്‍ജി സമയബന്ധിതമായി തീര്‍പ്പാക്കണമെന്ന കെഎം ഷാജിയുടെ അഭിഭാഷകന്‍റെ ആവശ്യം സുപ്രീം കോടതി തള്ളി. തെരഞ്ഞെടുപ്പ് കേസുകളില്‍ സാധാരണ നടക്കുന്ന നടപടിക്രമങ്ങളാണ് ഷാജിയുടെ കേസിലും നടക്കുന്നതെന്ന് കോടതി ചൂണ്ടിക്കാട്ടി. അത് തുടരുമെന്നും കോടതി വ്യക്തമാക്കി. സ്റ്റേ ഉത്തരവിന്‍റെ പിന്‍ബലത്തില്‍ എംഎല്‍എ ആയി തുടരാനാണോ ആഗ്രഹിക്കുന്നതെന്ന് കോടതി ആരാഞ്ഞു.