ഇനി ഭിന്നശേഷിക്കാർക്കും ലോകം ചുറ്റികാണാൻ അവസരം

കൊച്ചി: ജന്മനാ ജീവിതം ചക്രകസേരയിൽ ഒതുങ്ങി പോയവരാണോ നിങ്ങള്‍. ഏതെങ്കിലും രോഗമോ അപകടമോ മൂലം നാലുചുവരുകള്‍ക്കുള്ളിൽ അനക്കമില്ലാതെ കഴിയുന്നവരാണോ. കാഴ്ചവൈകല്യം മൂലം വിഷമിക്കുന്നവരാണോ. ഒരു തവണയെങ്കിലും ലോകം ചുറ്റി കാണാൻ നിങ്ങള്‍ക്ക് ആഗ്രഹമുണ്ടെങ്കിൽ സഹായിക്കാൻ ഇവരുണ്ട്.

ചിത്രങ്ങള്‍: അജിലാൽ(TOI)
ചക്രകസേരയിലിരിക്കുന്നവരെ ജെസിബിയിൽ ക്രൂസ് ബോട്ടിലെ മുകള്‍ നിലയിലേക്ക് കയറ്റുന്നു

അംഗപരിമിതർക്കും ഭിന്നശേഷിക്കാർക്കും വിനോദ സഞ്ചാരത്തിന് അവസരമൊരുക്കുന്ന സ്‌പെഷൽ കെയർ ഹോളിഡേയ്‌സ് പ്രവർത്തനം ആരംഭിച്ചു. നൂറ്റൻപതിലേറെ വരുന്ന ഭിന്നശേഷിക്കാരായ വിനോദ സഞ്ചാരികളുടെ സംഘത്തിന് ആലപ്പുഴയിൽ ഒരുക്കിയ ഹൗസ് ബോട്ട് യാത്രയോടെയാണ് തുടക്കമായത്. 30 വർഷമായി ചക്രക്കസേരയെ ആശ്രയിച്ച് ജീവിതവഴികള്‍ താണ്ടുന്ന സൈമൺ ജോർജ്ജാണ് സ്പെഷൽ കെയർ ഹോളി‍ഡെയ്സ് എന്ന പേരിൽ ഈ സംരംഭം ആരംഭിച്ചിരിക്കുന്നത്. മൂവാറ്റുപുഴ കല്ലൂർകാട് സ്വദേശിയാണു സൈമൺ.

ജെസിബിയിൽ ക്രൂസ് ബോട്ടിലെ മുകള്‍ നിലയിലേക്ക് കയറ്റുന്നു


കൊച്ചിയിൽ കായൽ സവാരിയും ക്രൂസ് ബോട്ടിൽ ഇവർ നടത്തി. ജെ.സി.ബിയിലും മറ്റും കയറ്റിയിരുത്തി ക്രൂസ് ബോട്ടിലെ മുകള്‍ നിലയിലേക്ക് ചക്രകസേരയിലിരിക്കുന്നവരെ കയറ്റിയിരുത്തിയത് കൂടിനിന്നവർക്കെല്ലാം നവ്യാനുഭവമായിരുന്നു. ഭിന്നശേഷിക്കാർക്ക് അനുയോജ്യമായ വാഹനങ്ങൾ, പ്രത്യേക പരിശീലനം ലഭിച്ച കോ– ഓർഡിനേറ്റർമാർ, ഡോക്ടർമാർ, നഴ്‌സിങ് സ്റ്റാഫ്, വീൽചെയർ ഉരുട്ടിക്കേറ്റാനുള്ള റാംപുകൾ, മോട്ടോറെസ്ഡ് വീൽചെയറുകൾ, ഭിന്നശേഷിക്കാർക്കു യോജിച്ച ഹോട്ടൽ മുറികൾ, ശുചിമുറികൾ, കാഴ്ച പരിമിതിയുള്ളവർക്കു ബ്രെയിലി, കേൾവി പരിമിതിയുള്ളവർക്കു സൈൻ ലാംഗ്വേംജ് മെറ്റീരിയലുകൾ, സൈനുകൾ തുടങ്ങിയ ഒട്ടേറെ ഭിന്നശേഷി സൗഹാർദമായ കാര്യങ്ങൾ ഇവർ ഒരുക്കിയിട്ടുണ്ട്.

സൈമൺ ജോർജ്ജിനോടൊപ്പം യാത്രയിൽ പങ്കെടുത്തവർ


സംസ്ഥാനത്തെ ടൂറിസം കേന്ദ്രങ്ങളിലും ഇത്തരം സൗകര്യങ്ങൾ ഏർപ്പെടുത്താനുള്ള ശ്രമത്തിലാണ് ഇദ്ദേഹം. ഭിന്നശേഷിക്കാർക്കുള്ള എല്ലാവിധ സൗകര്യങ്ങളുമുള്ള നാലു വാഹനങ്ങൾ കമ്പനി ടൂറിനായി ഒരുക്കിയിട്ടുമുണ്ട്. ഇവരുടെ ഫോൺ: 81296 01425.