മാണി കുറ്റക്കാരൻ, തെളിവുണ്ടെന്ന് സ്‌പെഷ്യൽ പ്രോസിക്യൂട്ടർ

കൊച്ചി: മുൻ മന്ത്രി കെ.എം.മാണിയെ കുറ്റവിമുക്തനാക്കി കൊണ്ടുള്ള വിജിലൻസ് റിപ്പോർട്ടിനെതിരെ സ്‌പെഷ്യൽ പബ്ലിക് പ്രോസിക്യൂട്ടർ. മാണിക്കെതിരെ തെളിവില്ലെന്ന വിജിലൻസ് കണ്ടെത്തലിനെതിരെയാണ് പ്രോസിക്യൂട്ടർ രംഗത്ത് വന്നിരിക്കുന്നത്. മാണിക്കെതിരെ തെളിവുണ്ടെന്നും അന്വേഷണം തുടരണമെന്നുമാണ് താൻ നൽകിയ നിയമോപദേശമെന്ന് അഡ്വ.കെ.പി സതീശൻ വെളിപ്പെടുത്തി.

അന്വേഷണത്തിന്‍റെ ആരംഭം മുതൽ തന്നെ മാണിയെ രക്ഷിക്കാനുള്ള ശ്രമമാണ് നടന്നു വന്നത്. കേസ് ശരിയായ രീതിയിൽ അന്വേഷിച്ചിരുന്നെങ്കിൽ മാണി കുറ്റക്കാരനാകുമായിരുന്നു. കഴിഞ്ഞ ദിവസം തന്നെ വന്നു കണ്ട അന്വേഷണ ഉദ്യോഗസ്ഥനോട് താൻ ഈ കാര്യങ്ങൾ വെളിപ്പെടുത്തിയിരുന്നെന്നും സതീശൻ പറഞ്ഞു. ബാറുടമകളുടെ ശബ്ദരേഖ അടങ്ങിയ എഡിറ്റ് ചെയ്യാത്ത സിഡി പരിശോധനക്കായി അഹമ്മദാബാദിലേക്ക് അയക്കണമെന്ന് താൻ പറഞ്ഞിരുന്നെന്ന് സതീശൻ വ്യക്തമാക്കി.

എഡിറ്റ് ചെയ്യാത്ത സിഡി തിരുവനന്തപുരം വിജിലൻസ് കോടതിയിൽ ഉണ്ടെന്ന് താൻ പറഞ്ഞിരുന്നു. എന്നാൽ ഇത്രയും കാര്യങ്ങൾ പറഞ്ഞിട്ടും കേസിൽ പിന്നീടെന്താണ് സംഭവിച്ചത് എന്താണെന്ന് അറിയില്ലെന്ന് സതീശൻ വ്യക്തമാക്കി. മാണിയെ കുറ്റവിമുക്തനാക്കിയുള്ള റിപ്പോർട്ട് സമർപ്പിക്കുന്നതായി വിജിലൻസ് തന്നെ അറിയിച്ചിരുന്നില്ല. വാർത്ത അറിഞ്ഞയുടൻ അന്വേഷണ ഉദ്യോഗസ്ഥനെ ബന്ധപ്പെടാൻ ശ്രമിച്ചെങ്കിലും അദ്ദേഹം അവധിയിലാണെന്ന മറുപടിയാണ് ലഭിച്ചതെന്ന് സതീശൻ വ്യക്തമാക്കി.