പ്രളയം: കേരളത്തില്‍ നിന്നുള്ള സുഗന്ധ വ്യഞ്ജന വില ഉയര്‍ന്നു

കൊച്ചി: കേരളത്തില്‍ നിന്നുള്ള സുഗന്ധ വ്യജ്ഞനങ്ങളുടെ വില വര്‍ധിച്ചു. പ്രളയത്തിന് ശേഷമാണ് മറ്റു സംസ്ഥാനങ്ങളിലേക്ക് കയറ്റിയയക്കുന്ന സുഗന്ധ വ്യജ്ഞനങ്ങളുടെ വിലയില്‍ ഏതാണ്ട് 25 ശതമാനംവരെ വര്‍ധനയുണ്ടായതെന്ന് മഹാരാഷ്ട്ര ടൈംസ് റിപ്പോര്‍ട്ട് ചെയ്‍തു.

ജാതിക്ക, ജാതിപത്രി, ഗ്രാമ്പൂ, ഏലം, ചുക്ക്, കുരുമുളക് വിലകളാണ് വര്‍ധിച്ചത്.

മൊത്ത വ്യാപരത്തെയും ചില്ലറ വ്യാപരത്തെയും വില ബാധിച്ചിട്ടുണ്ട്. മഹാരാഷ്ട്ര നവി മുംബൈയിലെ കാര്‍ഷിക വിപണിയായ എപിഎംസിയില്‍ ആണ് സുഗന്ധ വ്യജ്ഞനങ്ങളുടെ വ്യാപാരം കേന്ദ്രീകരിച്ചിരിക്കുന്നത്. പഞ്ചസാര, ശര്‍ക്കര, സുഗന്ധദ്രവ്യങ്ങള്‍ തുടങ്ങിയ ചരക്കുകളുമായി ദിവസേന 300 ലോറികള്‍ എന്നും വിപണിയില്‍ എത്തുന്നുണ്ട്.

പ്രളയത്തെ തുടര്‍ന്ന് സാധനങ്ങളുടെ വരവില്‍ 20 മുതല്‍ 25 ശതമാനംവരെ കുറവുണ്ടായി. കേരളത്തിലെ മലയോര മേഖലകളില്‍ കൃഷി ഏതാണ്ട് പൂര്‍ണമായും പ്രളയത്തെ തുടര്‍ന്ന് നശിച്ച സാഹചര്യമാണ്. അടുത്തെങ്ങും വില കുറയാന്‍ സാധ്യതയില്ലെന്ന് എഎംപിസി ഡയറക്ടര്‍ കീര്‍ത്തി റാണ പറഞ്ഞു. മുംബൈയിലേക്കുള്ള നാളികേരം വിതരണത്തെയും പ്രളയം ബാധിച്ചിട്ടുണ്ട്.