സുരേന്ദ്രൻ്റെ മോചനത്തിനായി സമരം ചെയ്യുമെന്ന് ശ്രീധരൻ പിള്ള

ഇടുക്കി: ബിജെപി സംസ്ഥാന ജനറൽ സെക്രട്ടറി കെ സുരേന്ദ്രനെ കള്ളക്കേസിൽ കുടുക്കി ജയിലിൽ അടയ്ക്കാനുള്ള ശ്രമമാണ് നടക്കുന്നതെന്ന് പാര്‍ട്ടി സംസ്ഥാന അധ്യക്ഷൻ പി എസ് ശ്രീധരൻ പിള്ള. സുരേന്ദ്രൻ്റെ മോചനത്തിനു വേണ്ടി പ്രതിഷേധം സംഘടിപ്പിക്കുമെന്നും ശ്രീധരൻ പിള്ള പറഞ്ഞു. നവംബര്‍ 25ന് മുഖ്യമന്ത്രിയുടെ ഓഫീസിനു നേരെയും ശനിയാഴ്ച തൃശൂര്‍ കമ്മീഷണര്‍ ഓഫീസിനു നേരെയും മാര്‍ച്ച് നടത്തുമെന്നും ശ്രീധരൻ പിള്ള പറഞ്ഞു.

ശബരിമല പ്രതിഷേധത്തിനിടെ അറസ്റ്റിലായി റിമാൻഡിൽ കഴിയുന്ന കെ സുരേന്ദ്രനെ സന്ദര്‍ശിക്കാൻ ശ്രീധരൻ പിള്ള ഉള്‍പ്പെടെയുള്ള പാര്‍ട്ടി നേതാക്കള്‍ എത്താത്തതിൽ ഒരു വിഭാഗം നേതാക്കള്‍ക്കും പ്രവര്‍ത്തകര്‍ക്കും അതൃപ്തിയുണ്ടെന്ന തരത്തിലുള്ള റിപ്പോര്‍ട്ടുകള്‍ പുറത്തു വന്നിരുന്നു. നേട്ടമുണ്ടാക്കാൻ പറ്റുന്ന സാഹചര്യത്തിലും ഗ്രൂപ്പിസത്തിന് മുൻഗണന കൊടുക്കുന്നത് ഗുണം ചെയ്യില്ലെന്നാണ് വിമര്‍ശനം. ഈ സാഹചര്യത്തിലാണ് ശ്രീധരൻ പിള്ളയുടെ പ്രസ്താവന.

മൂന്ന് ഓഫീസര്‍മാര്‍ പിണറായി കിങ്കരന്മാരായി അയ്യപ്പ വേട്ടയ്ക്ക് വേണ്ടി പ്രവര്‍ത്തിക്കുകയാണെന്നും സര്‍ക്കാരിന്‍റെ സത്യവാങ്മൂലത്തിൽ സത്യമില്ലെന്നും ശ്രീധരൻ പിള്ള പറഞ്ഞു. ശബരിമലയിലെ നടവരവ് കുറഞ്ഞതിലെ മുഖ്യപ്രതികള്‍ മുഖ്യമന്ത്രിയും ദേവസ്വം മന്ത്രിയും പോലീസുമാണെന്നും ശ്രീധരൻ പിള്ള ആരോപിച്ചു.