തന്‍റെ സമരത്തെ ചിലര്‍ മുതലെടുത്തെന്ന് ശ്രീജിത്ത്

തിരുവനന്തപുരം: സമരത്തെ പിന്തുണച്ച് എത്തിയവരുടെ കൂട്ടത്തിൽ ചിലര്‍ മുതലെടുത്തെന്നും സാമ്പത്തികലാഭമുണ്ടാക്കാൻ ശ്രമിച്ചെന്നും വെളിപ്പെടുത്തി ശ്രീജിത്ത്. സഹോദരന്‍റെ കസ്റ്റഡി മരണത്തിൽ നീതി തേടി സെക്രട്ടറിയേറ്റിൽ സമരം ചെയ്യവേ പിന്തുണയുമായെത്തിയ സമൂഹമാധ്യമക്കൂട്ടായ്മയിലെ ചിലര്‍ തന്നെ ബുദ്ധിമുട്ടിച്ചതായും ശ്രീജിത്ത് വെളിപ്പെടുത്തി. ചിലര്‍ തന്നെ മാനസികമായി ബുദ്ധിമുട്ടിച്ചു. ഒപ്പം നിന്ന ചിലര്‍ പിന്നീട് തള്ളിപ്പറഞ്ഞെന്നും ശ്രീജിത്ത് പറഞ്ഞു.

സമരത്തിന്‍റെ സമയത്ത് ചിലര്‍ സാമ്പത്തികസഹായവുമായി മുന്നോട്ടു വന്നെങ്കിലും പ്രോത്സാഹിപ്പിച്ചില്ല. സമരത്തിൽ നിന്ന് പിൻമാറുന്ന സമയത്ത് ഫേസ്ബുക്ക് കൂട്ടായ്മയിലെ ചിലര്‍ പണം വാങ്ങിയതായി പിന്നീടാണ് അറിഞ്ഞതെന്ന് ശ്രീജിത്ത് പറഞ്ഞു. ഇതു കൂടാതെ മറ്റു ചിലരും പണപ്പിരിവ് നടത്തിയിട്ടുണ്ട്. ഇപ്പോഴും ചിലര്‍ പണപ്പിരിവ് നടത്തുന്നതായി അറിഞ്ഞെന്നും എന്നാൽ ഇവരുമായി തനിക്ക് ബന്ധമില്ലെന്നും ശ്രീജിത്ത് അറിയിച്ചു.

അതേസമയം, സമൂഹമാധ്യമ കൂട്ടായ്മയിലെ കുറേപേർ അവസാനം വരെ ഒപ്പമുണ്ടായതായും ശ്രീജിത്ത് പറഞ്ഞു. അവർ ഉറച്ച പിന്തുണ നൽകി എന്നും ഒപ്പമുണ്ടായിരുന്നു.

എന്നാൽ, കുറ്റവാളികളായ പൊലീസ് ഉദ്യോഗസ്ഥർ സ്വന്തം നാട്ടുകാരാണെന്നതുമൂലം നാട്ടിൽ ജീവിക്കാന്‍ ആശങ്കയുണ്ടെന്നും തനിക്കെതിരെ ഗൂഢാലോചന നടക്കുന്നതായി സംശയമുണ്ടെന്നും ശ്രീജിത്ത് വെളിപ്പെടുത്തി.

ചികിത്സയ്ക്കു ശേഷം ആരോഗ്യം വീണ്ടെടുത്ത ശ്രീജിത്ത് ഇന്നു വീട്ടിലേയ്ക്ക് മടങ്ങും.