ശ്രീശാന്ത് ബിജെപി അംഗത്വമെടുക്കും: കുമ്മനം

തിരുവനന്തപുരം: ക്രിക്കറ്റ് താരം എസ്.ശ്രീശാന്ത് ബിജെപിയിൽ അംഗത്വമെടുക്കുമെന്നു ബിജെപി സംസ്ഥാന അധ്യക്ഷൻ കുമ്മനം രാജശേഖരൻ. ശ്രീശാന്തിന് മാത്രമല്ല, ആദിവാസി ഗോത്രമഹാസഭ നേതാവ് സി.കെ. ജാനുവുമായി ചർച്ച നടത്തിയെന്നും മൽസരിക്കാൻ തയാറാണെങ്കിൽ അവർക്കും സീറ്റു നൽകുമെന്നും കുമ്മനം പറഞ്ഞു. എന്നാൽ ബിജെപി സ്ഥാനാർഥിയാകാനില്ലെന്ന് സി.കെ. ജാനു പ്രതികരിച്ചു.

തൃപ്പൂണിത്തുറയിലാണ് ശ്രീശാന്തിനെ ബിജെപി സ്ഥാനാർഥിയായി പരിഗണിക്കുന്നത്. തൃപ്പൂണിത്തുറയില്ലെങ്കിൽ മൽസരിക്കാനില്ലെന്ന നിലപാടാണു ശ്രീശാന്തിന്. ഇവിടെയുള്ള അടുത്ത ബന്ധുക്കളുടെ സാന്നിധ്യവും രാജകുടുംബത്തിന്റെ പിന്തുണയും ശ്രീശാന്തിന് അനുകൂലമാകുമെന്നാണ് കണക്കുകൂട്ടുന്നത്. എന്നാൽ ശ്രീശാന്തിനെ തൃപ്പൂണിത്തുറയിൽ സ്ഥാനാർഥിയാക്കാനുള്ള തീരുമാനത്തിനെതിരെ മണ്ഡലത്തിലെ ബിജെപി പ്രവർത്തകർക്കിടയിൽ അസ്വാരസ്യങ്ങളുണ്ടാക്കിയിട്ടുണ്ട്.