ഓഖി ദുരിതാശ്വാസം: പൊതുജനങ്ങളിൽ നിന്ന് സഹായം തേടി സർക്കാർ

തിരുവനന്തപുരം: ഓഖി ചുഴലിക്കാറ്റ് ദുരന്തത്തിന്‍റെ ഇരകള്‍ക്ക് സാമ്പത്തികസഹായം നല്‍കാനും പുനരധിവസിപ്പിക്കാനുമായി മുഖ്യമന്ത്രിയുടെ ദുരിതാശ്വാസനിധിയിലേയ്ക്ക് സംഭാവന നല്‍കാൻ മുഖ്യമന്ത്രി പിണറായി വിജയൻ അഭ്യര്‍ത്ഥിച്ചു.

കേരളത്തിലെ സര്‍ക്കാര്‍, അര്‍ധസര്‍ക്കാര്‍, കേന്ദ്ര ജീവനക്കാര്‍ ജീവനക്കാര്‍, സര്‍വീസ് സംഘടനകള്‍, സ്വകാര്യ സ്ഥാപനങ്ങളിലെ ജീവനക്കാര്‍, വ്യവസായികള്‍, വ്യാപാരികള്‍, കലാ- സാഹിത്യ രംഗത്തുള്ളവര്‍ തുടങ്ങി എല്ലാ മേഖലകളിലുമുള്ളവര്‍ ഈ ജീവകാരുണ്യ സംരംഭത്തില്‍ സഹകരിക്കണമെന്ന് മുഖ്യമന്ത്രി അഭ്യർഥിച്ചു.

ആദായനികുതി നിയമത്തിലെ സെക്ഷന്‍ 80 ജി (2) (IIIHF) പ്രകാരം മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സംഭാവനകള്‍ ആദായനികുതിയില്‍ 100 ശതമാനം ഇളവിന് അര്‍ഹതയുണ്ട്. ചെക്ക് മുഖേനയുള്ള സംഭാവനകള്‍ പ്രിന്‍സിപ്പല്‍ സെക്രട്ടറി (ധനകാര്യം), ട്രഷറര്‍, മുഖ്യമന്ത്രിയുടെ ദുരിതാശ്വാസനിധി, സെക്രട്ടറിയറ്റ്, തിരുവനന്തപുരം - 1 എന്ന വിലാസത്തിൽ അയയ്ക്കാം.

ഓൺലൈൻ മുഖേന പണമയയ്ക്കാൻ താഴെ കൊടുത്തിരിക്കുന്ന ബാക്ക് അക്കൗണ്ട് വിവരങ്ങൾ ഉപയോഗിക്കാം - ബാങ്ക് അക്കൗണ്ട് നമ്പര്‍: 67319948232, ബാങ്ക്: സ്റ്റേറ്റ് ബാങ്ക് ഓഫ് ഇന്ത്യ തിരുവനന്തപുരം സിറ്റി ശാഖ, IFS Code: SBIN0070028.

ദുരിതാശ്വാസത്തിന് വലിയ തുക ആവശ്യമുള്ളതിനാൽ വ്യക്തികളുടെയും സ്ഥാപനങ്ങളുടെയും സംഘടനകളുടെയും സഹായം കൂടി അനിവാര്യമാണെന്ന് മുഖ്യമന്ത്രി പറഞ്ഞു