ഡോ. ജേക്കബ് മണ്ണാറപ്രായിൽ കോർ എപ്പിസ്‌കോപ്പ അന്തരിച്ചു

കൊച്ചി: പ്രമുഖ സാമൂഹിക പ്രവർത്തകനും മദ്യ നിരോധന സമിതിയുടെ സംസ്ഥാന പ്രസിഡന്‍റുമായിരുന്ന ഡോ. ജേക്കബ് മണ്ണാറപ്രായിൽ കോർ എപ്പിസ്‌കോപ്പ(74) അന്തരിച്ചു. ഹൃദയസ്തംഭനം മൂലം രാജഗിരി ആശുപത്രിയിൽ ചികിത്സയിലായിരുന്നു. അരനൂറ്റാണ്ടായി സാമൂഹിക സാംസ്കാരിക മേഖലകളിൽ നിറ സാന്നിദ്ധ്യമായിരുന്നു അദ്ദേഹം. വൈദിക പഠനം പൂർത്തിയാക്കിയ ശേഷം വിവിധ സഭാ ചുമതലകൾ വഹിച്ചിട്ടുണ്ട് ഡോ.ജേക്കബ് മണ്ണാറപ്രായിൽ കോർ എപ്പിസ്കോപ്പ. 1970 മുതൽ സഭാതർക്കം രൂക്ഷമായിരുന്ന സമയത്ത് നാലു പതിറ്റാണ്ടോളം ആലുവ തൃക്കുന്നത്ത് സെമിനാരിയുടെ മാനേജർ, വികാരി എന്നീ തസ്തികളിൽ സേവനമനുഷ്ടിച്ചിട്ടുണ്ട് അദ്ദേഹം.

പോത്താനിക്കാട് മണ്ണാറപ്രായിൽ പൗലോസിന്റെയും ജീരകത്തോട്ടം ഏലിയാമ്മയുടെയും മകനാണ്. മാർ അത്തനേഷ്യസ് സ്‌കൂൾ റിട്ട. അദ്ധ്യാപിക പെരുമ്പാവൂർ തെക്കേ വീട്ടിൽ ലീലാമ്മയാണ് ഭാര്യ. മക്കൾ: ലിജോ മണ്ണാറപ്രായിൽ (ടി.സി.എസ്), സിജോ ജേക്കബ് (ഇൻഫോസിസ്, തിരുവനന്തപുരം). മരുമക്കൾ: സൂസൻ (ടി.സി.എസ്), ബിനോയ് പോൾ.

സാമൂഹിക സാമുദായിക മേഖലകളിലെ വിശിഷ്ട സേവനത്തിന് ഗ്രേസ് ഷെവലിയാർ , ജസ്റ്റിസ് വിതയത്തിൽ അവാർഡ് തുടങ്ങിയ പുരസ്കാരങ്ങള്‍ നേടിയിട്ടുണ്ട്. ശവ സംസ്കാരം ബുധനാഴ്ച നടക്കും.