ചിക്കന് ഗമ കൂടി; ഒരു കിലോ കോഴിക്ക് 138 രൂപ

കൊച്ചി: പ്രളയശേഷം ഗമ കൂടി ചിക്കൻ. ഒരു കിലോ ഇറച്ചിക്കോഴിക്ക് ഇന്നത്തെ വില 138 രൂപയാണ്. രണ്ടാഴ്ചക്കിടെ കോഴിവിലയിൽ 45 രൂപയുടെ വർധനവാണ് ഉണ്ടായിരിക്കുന്നത്. ജിഎസ്ടി വന്നശേഷം ഇത് രണ്ടാം തവണയാണ് ഇറച്ചിക്കോഴിക്ക് ഇത്രയും വില കൂടിയിരിക്കുന്നത്. ജൂൺ മാസത്തിലും ഇൗ നിലയിൽ കോഴിവില എത്തിയിരുന്നു.

രണ്ടാഴ്ച മുൻപ് ഒരു കിലോ ഇറച്ചിക്കോഴിക്ക് വില 93 രൂപയായിരുന്നു. തമിഴ്നാട്ടിൽ നിന്നും ഇറച്ചിക്കോഴി കുഞ്ഞുങ്ങളുടെ ലഭ്യത കുറഞ്ഞിരിക്കുന്നതാണ് ഇപ്പോഴത്തെ വിലക്കയറ്റത്തിനുള്ള കാരണമായി പറയുന്നത്. തമിഴ്നാട്, കർണ്ണാടക തുടങ്ങിയ സംസ്ഥാനങ്ങളിൽ നിന്നാണ് പ്രധാനമായും കോഴിയെത്തുന്നത്. വില വര്‍ധനവ് മൂലം ഹോട്ടലുകളില്‍ കോഴി വിഭവങ്ങള്‍ക്ക് വില കൂടാനാണ് സാധ്യത.

കോഴിക്കുഞ്ഞുങ്ങളുടെ ലഭ്യത കുറഞ്ഞതോടെ കേരളത്തിലെ ആഭ്യന്തര ഉൽപാദനം കുറഞ്ഞിട്ടുണ്ട്. മറ്റ് സംസ്ഥാനങ്ങളിൽ നിന്ന് അധികമായി ഇറച്ചിക്കോഴി എത്തിക്കുമ്പോൾ ഉണ്ടാകുന്ന ഭാരിച്ച ചിലവും കൂടിയായതാണ് കോഴിയുടെ ലഭ്യതക്കുറവിന് കാരണമായി വ്യാപാരികൾ ചൂണ്ടിക്കാട്ടുന്നത്.