നീന്തൽ പരിശീലിക്കവെ വിദ്യാർത്ഥി മുങ്ങിമരിച്ചു

ആമ്പല്ലൂർ: അരയൻകാവിൽ പഞ്ചായത്ത് കുളത്തിൽ നീന്തൽ പരിശീലിക്കവെ വിദ്യാർത്ഥി മുങ്ങിമരിച്ചു. കാഞ്ഞിരമറ്റം നെടുവേലികുന്നേൽ സന്തോഷ് ആശ ദമ്പതികളുടെ മകൻ സിദ്ധാർത്ഥ് (16) ആണ് മരിച്ചത്.

കാഞ്ഞിരമറ്റത്തുനിന്നും നാല് സൃഹൃത്തുക്കൾക്കൊപ്പം അരയൻകാവ് പുതുവാ തൃക്കോവിൽ കുളത്തിൽ നീന്തൽ പരിശീലിക്കവെയാണ് അപകടം ഉണ്ടായത്. കാഞ്ഞിരമറ്റത്ത് ട്യൂഷൻ കഴിഞ്ഞ ശേഷം പത്തരയോടെയാണ് കുട്ടികൾ അരയൻകാവിലെത്തുന്നത്.

നീന്തലിനിടെ സിദ്ധാർത്ഥിനെ കാണാതായതോടെ കൂട്ടുകാർ നാട്ടുകാരെ വിവരം അറിയിക്കുകയായിരുന്നു. മുളന്തുരുത്തിയിൽനിന്നെത്തിയ പോലീസും ഫയർഫോഴ്സും നാട്ടുകാരും ചേർന്നാണ് കുട്ടിയുടെ മൃതദേഹം മുങ്ങിയെടുത്തത്. തൃപ്പൂണിത്തുറ താലൂക്ക് ആശുപത്രിയിലേക്ക് കുട്ടിയുടെ മൃതദേഹം കൊണ്ടുപോയി.

പത്താംക്ലാസ് കഴിഞ്ഞ് തലക്കോട് സെന്റ് മേരീസ് ഹയർസെക്കന്ററി സ്കൂളിൽ പ്ലസ് വൺ പ്രവേശനം നേടിയിരിക്കുകയായിരുന്നു സിദ്ധാർത്ഥ്.