രണ്ടു ദിവസം കൂടി സൂര്യാഘാതം തുടരും: 118 പേർക്ക് സൂര്യാഘാതമേറ്റു

തിരുവനന്തപുരം: സംസ്ഥാനത്ത് സൂര്യാഘാത മുന്നറിയിപ്പ് തുടരുന്നു. ഇന്നലെ വരെ സംസ്ഥാനത്ത് 118 പേർക്ക് സൂര്യാഘാതം ഏറ്റെന്ന് ആരോഗ്യവകുപ്പ് വ്യക്തമാക്കുന്നു. ഈ ആഴ്ച മാത്രം 55 പേർക്ക് സൂര്യാഘാതമേറ്റു. അഞ്ച് ജില്ലകളിൽ താപനില നാല് ഡിഗ്രി വരെ കൂടാൻ സാധ്യതയുണ്ട്. കൊല്ലം, കോട്ടയം, ആലപ്പുഴ, എറണാകുളം, തൃശൂർ ജില്ലകളിലാണ് താപനില കൂടാൻ സാധ്യതയുള്ളത്. രണ്ടു ദിവസത്തേക്ക് കൂടി സൂര്യാഘാതം തുടരാനും സാധ്യതയുണ്ടെന്ന് ആരോഗ്യ വകുപ്പ് മുന്നറിയിപ്പ് നൽകുന്നു. കണ്ണൂരും പാറശാലയിലും രണ്ടു പേർ കുഴഞ്ഞുവീണ് മരിച്ചിരുന്നു. മൃതദേഹങ്ങളിൽ പൊള്ളലേറ്റ പാടുകൾ കണ്ടെത്തി.

ഇരുവരും സമാന രീതിയിൽ കുഴഞ്ഞു വീണാണ് മരിച്ചത്. കാസർഗോഡ് മൂന്ന് വയസുകാരി മർവക്ക് പൊള്ളലേറ്റിരുന്നു. പുനലൂർ മണ്ഡലം ആർഎസ്‌പി നേതാവിന് പ്രചാരണത്തിനിടെ സൂര്യാഘാതമേറ്റു. ആറ് ജില്ലകളിൽ താപനില മൂന്ന് ഡിഗ്രി വരെ ഉയരാൻ സാധ്യതയുണ്ട്. കണ്ണൂർ, കോഴിക്കോട്, തിരുവനന്തപുരം, പത്തനംതിട്ട, മലപ്പുറം, പാലക്കാട് എന്നീ ജില്ലകളിലാണ് മൂന്ന് ഡിഗ്രി സെൽഷ്യസ് വരെ താപനില ഉയരാൻ സാധ്യത.