തെരഞ്ഞെടുപ്പില്‍ ബാലറ്റ് പേപ്പറെന്ന ആവശ്യം സുപ്രീംകോടതി തള്ളി

ന്യൂഡല്‍ഹി: 2019 ലെ ലോക്സഭാ തെരഞ്ഞെടുപ്പില്‍ ബാലറ്റ് പേപ്പര്‍ ഉപയോഗിക്കണമെന്ന ഹര്‍ജി സുപ്രീം കോടതി തള്ളി. അടുത്ത വര്‍ഷം ഇലക്ട്രോണിക് വോട്ടിങ് മെഷീന് പകരം ബാലറ്റ് പേപ്പര്‍ ഉപയോഗിക്കണമെന്ന പൊതുതാത്പര്യ ഹര്‍ജിയാണ് കോടതി തള്ളിയത്. തെരഞ്ഞെടുപ്പില്‍ ഇവിഎം ദുരുപയോഗപ്പെടുത്തുന്നതിനെതിരെയായിരുന്നു ഹര്‍ജി.

എല്ലാ ഉപകരണങ്ങളും സംവിധാനങ്ങളും ശരിയായ രീതിയിലും ദുരുദ്ദേശത്തോടെയും ഉപയോഗിക്കാന്‍ കഴിയും. ഇത്തരം കാര്യങ്ങളില്‍ എപ്പോഴും സംശയങ്ങള്‍ ഉണ്ടാകുമെന്നും സുപ്രീം കോടതി വ്യക്തമാക്കി. ഈ നിരീക്ഷണത്തോടെ ഹര്‍ജി തള്ളിയതായി ചീഫ് ജസ്റ്റിസ് രഞ്ജന്‍ ഗൊഗോയ് അധ്യക്ഷനായ ബെഞ്ച് അറിയിക്കുകയായിരുന്നു. ന്യായ് ഭൂമി എന്ന സന്നദ്ധസംഘടനയാണ് ഇലക്ട്രോണിക് വോട്ടിങ് മെഷിനെതിരെ ഹര്‍ജി സമര്‍പ്പിച്ചത്.